தை மாதத்தை முன்னிட்டு, பழனி மலைக் கோயிலுக்கு திரளான பக்தா்கள் இரட்டை மாட்டு வண்டியில் வந்து சுவாமி தரிசனம் செய்தனா்.
பழனி கோயிலுக்கு தைப்பூசம், பங்குனி உத்திரம் உள்ளிட்ட முக்கிய விழாக் காலங்களில் லட்சக்கணக்கான பக்தா்கள் பாதயாத்திரையாக வந்து முருகப் பெருமானை தரிசனம் செய்கின்றனா். இதேபோல, உடுமலை, பொள்ளாச்சி ஆகிய பகுதிகளிலிருந்து ஆயிரக்கணக்கான பக்தா்கள் இரட்டை மாட்டு வண்டியில் வந்து சுவாமி தரிசனம் செய்வது வழக்கம்.
தற்போது, நவீன காலத்தில் வாகனங்கள் அதிகரித்து விட்டலூம், பாரம்பரியத்தை மாற்றாமல் இன்றளவும் ஏராளமான பக்தா்கள் இரட்டை மாட்டுவண்டியில் வந்து சுவாமி தரிசனம் செய்கின்றனா்.
இதன்படி, திங்கள்கிழமை உடுமலை, பொள்ளாச்சி, பணிக்கம்பட்டி ஆகிய பகுதிகளிலிருந்து திரளான பக்தா்கள் இரட்டை மாட்டு வண்டியில் பழனிக்கு வந்தனா். இரவில் அங்கு தங்கி பிறகு, செவ்வாய்க்கிழமை அதிகாலை மலைக்குச் சென்று சுவாமி தரிசனம் செய்தனா்.
இதுகுறித்து அவா்கள் கூறியதாவது: எங்களது முன்னோா்கள் காலத்தில் இருந்து மாட்டு வண்டியில் இங்கு குடும்பத்தோடு வந்து சுவாமி தரிசனம் செய்கிறோம். இன்றளவும் இதை கடைப்பிடித்து வருகிறோம்.
இந்த முறை மாட்டு வண்டி, குதிரை வண்டி என 25-க்கும் மேற்பட்ட வண்டிகளில் நூற்றுக்கணக்கானோா் இங்கு வந்தோம். ஆனால், நீதிமன்ற உத்தரவால் மாட்டு வண்டிகளை கிரிவீதியில் கொண்டு செல்ல முடியவில்லை. இது எங்களுக்கு வருத்தமாக உள்ளது. ஒரு முறையாவது சுற்றிவர அனுமதித்தால் நன்றாக இருக்கும்.
மாட்டு வண்டிகளை கிரிவீதியில் நிறுத்த முடியாததால் இடப்பற்றாக் குறை காரணமாக, தனியாா் வாகன நிறுத்துமிடத்தில் பணம் கொடுத்து தங்க வேண்டிய நிலை ஏற்பட்டது. எனவே, கோயில் நிா்வாகம் சாா்பில், வாகன நிறுத்துமிடத்தை அகலப்படுத்த ஏற்பாடு செய்ய வேண்டும் என்றனா்.
