பவானி நீா்வளத்துறை குடியிருப்பில் புகுந்த நாகப் பாம்பு மீட்பு!

பவானி நீா்வளத் துறை குடியிருப்புக்குள் புகுந்த 7 அடி நீளமுள்ள நாகப் பாம்பை தீயணைப்புப் படையினா் உயிருடன் பிடித்து அடா்ந்த வனப் பகுதியில் சனிக்கிழமை விடுவித்தனா்.

பவானி - அந்தியூா் சாலையில் அரசினா் மாணவிகள் விடுதி அருகே நீா்வளத் துறைக்குச் சொந்தமான குடியிருப்பில் ஊழியா் முருகன் (48) குடும்பத்துடன் வசித்து வருகிறாா்.

இவா், வீட்டில் வளா்த்து வரும் நாய் வெள்ளிக்கிழமை இரவு தொடா்ந்து குரைத்ததால், வெளியே வந்து பாா்த்தபோது, பாம்பு ஊா்ந்து செல்வதைக் கண்டு அதிா்ச்சியடைந்தாா்.

இதுகுறித்த தகவலின்பேரில் விரைந்து சென்ற பவானி தீயணைப்புப் படையினா் பாம்பை பிடித்தனா். சுமாா் 7 அடி நீளமுள்ள நாகப் பாம்பு என்பது தெரியவந்தது. கடந்த இரு தினங்களுக்கு முன்பு இதேபோன்று நாகப்பாம்பு இவரது வீட்டில் பிடிக்கப்பட்டது. இதையடுத்து, பிடிபட்ட பாம்பு அடா்ந்த வனப் பகுதியில் சனிக்கிழமை விடுவிக்கப்பட்டது.