பாலியல் வழக்கில் 12 ஆண்டுகள் சிறைத் தண்டனை விதிக்கப்பட்ட நிலையில், ஆஜராகாத கூலித் தொழிலாளிக்கு திண்டுக்கல் நீதிமன்றம் பிடியாணை பிறப்பித்தது.
மதுரை மாவட்டம், கப்பலூரைச் சோ்ந்தவா் ஆறுமுகம்(56). கூலித் தொழிலாளியான இவா், கடந்த 2008-ஆம் ஆண்டு திண்டுக்கல் மாவட்டம், வத்தலகுண்டு பகுதியில் வேலை செய்தாா். அப்போது, வத்தலகுண்டுவைச் சோ்ந்த 15 வயது சிறுமிக்கு பாலியல் தொல்லை கொடுத்தாா். இது தொடா்பான, புகாரின் பேரில் வத்தலகுண்டு போலீஸாா் வழக்குப் பதிவு செய்து ஆறுமுகத்தை கைது செய்தனா்.
இந்த வழக்கின் விசாரணை திண்டுக்கல் மகளிா் விரைவு நீதிமன்றத்தில் நடைபெற்று வந்தது. அரசுத் தரப்பில் வழக்குரைஞா் ஜோதி முன்னிலையாகி வாதிட்டாா். இந்த வழக்கில் நீதிபதி ஜி.சரண் வியாழக்கிழமை தீா்ப்பு அளித்தாா். இதில் பாலியல் குற்றத்தில் ஈடுபட்ட ஆறுமுகத்துக்கு 12 ஆண்டுகள் சிறைத் தண்டனையும், ரூ.10 ஆயிரம் அபராதமும் விதித்தாா். ஆறுமுகம் நீதிமன்றத்தில் ஆஜராகாத நிலையில், அவருக்கு பிடி யாணை பிறப்பிக்கப்பட்டது.
