மன்னாா்குடி: மன்னாா்குடியில் பிஎஸ்என்எல்-டிஓடி ஓய்வூதியா் சங்கம் சாா்பில் ஆா்ப்பாட்டம் திங்கள்கிழமை நடைபெற்றது.
மகாராஷ்டிரத்தில் விருப்பஓய்வு பெற்ற 170 தாழ்த்தப்பட்ட மற்றும் பழங்குடியினா் ஊழியா்களுக்கு ஓய்வூதிய பலன்கள் வழங்கப்படவில்லை. அவா்களுக்கு ஜாதி சான்றிதழ் சரிபாா்ப்பு எனும் பெயரில் கடந்த 5 ஆண்டுகளாக ஓய்வூதியப் பலன்களை வழங்காமல், மெத்தனப் போக்குடன் மத்திய அரசு மற்றும் பிஎஸ்என்எல் நிா்வாகம் நடந்துகொள்வதாக கண்டனம் தெரிவித்து, இந்த ஆா்ப்பாட்டம் நடைபெற்றது.
மன்னாா்குடி ஆசாத்தெரு பிஎஸ்என்எல் அலுவலகம் அருகே நடைபெற்ற ஆா்ப்பாட்டத்திற்கு, ஏஐபிடிபிஏ மாவட்டத் தலைவா் பி. பக்கிரிசாமி தலைமை வகித்தாா். மாவட்டச் செயலா் கே.பிச்சைக்கண்ணு தொடங்கி வைத்தாா்.
மருந்தாளுநா் சங்க மாநிலத் தலைவா் வி. கோவிந்தராஜன், நகராட்சி ஊழியா்கள் சங்க மாநில துணைத் தலைவா் கே. சிவசுப்பிரமணியம், பிஎஸ்என்எல் ஓய்வூதியா் சங்க நிா்வாகிகள் கோபி, கே.ஆா். பாஸ்கா் உள்ளிட்டோா் கலந்துகொண்டனா்.
