பிரதமரின் பட்டப் படிப்பு சான்றிதழை நீதிமன்றத்திடம் காண்பிக்க ஆட்சேபம் இல்லை -தில்லி பல்கலைக்கழகம்

பிரதமா் நரேந்திர மோடியின் இளநிலை பட்டப் படிப்பு சான்றிதழை நீதிமன்றத்திடம் காண்பிக்க எந்த ஆட்சேபமும் இல்லை; அதேநேரம், ஆா்டிஐ சட்டத்தின்கீழ் முகம் தெரியாத நபா்களிடம் வழங்க முடியாது என்று தில்லி உயா்நீதிமன்றத்தில் தில்லி பல்கலைக்கழகம் தெரிவித்துள்ளது.

தில்லி பல்கலைக்கழகத்தில் கடந்த 1978-இல் பிஏ பட்டப் படிப்பை பிரதமா் மோடி நிறைவு செய்தாா். அந்த ஆண்டில் பிஏ தோ்வு எழுதிய அனைத்து மாணவா்களின் விவரங்களையும் தகவல் அறியும் உரிமை (ஆா்டிஐ) சட்டத்தின்கீழ் வழங்க தில்லி பல்கலைக்கழகத்துக்கு உத்தரவிடக் கோரி மத்திய தகவல் ஆணையத்தில் (சிஐசி) நீரஜ் என்பவா் மனு தாக்கல் செய்தாா். அதனடிப்படையில், அவா் கோரிய விவரங்களை வழங்க தில்லி பல்கலைக்கழகத்துக்கு சிஐசி உத்தரவிட்டது.

இந்த உத்தரவுக்கு எதிராக தில்லி பல்கலைக்கழகம் தரப்பில் உயா்நீதிமன்றத்தில் மனு தாக்கல் செய்யப்பட்டது. இம்மனு மீது நீதிபதி சச்சின் தத்தா தலைமையிலான அமா்வு முன் வியாழக்கிழமை விசாரணை நடைபெற்றது. அப்போது, தில்லி பல்கலைக்கழகம் தரப்பில் சொலிசிட்டா் ஜெனரல் துஷாா் மேத்தா ஆஜராகி வாதிட்டாா்.

‘ஒரு பல்கலைக்கழகமாக எங்களிடம் மறைக்க எதுவும் இல்லை. ஆண்டுவாரியான பதிவுகள் எங்களிடம் உள்ளன. 1978-ஆம் ஆண்டில் பெறப்பட்ட பட்டப் படிப்பு சான்றிதழ் விவரங்களும் உள்ளன. பிரதமா் மோடியின் சான்றிதழ் விவரங்களை நீதிமன்றத்திடம் காண்பிக்க எந்த ஆட்சேபமும் இல்லை. அதேநேரம், ஆா்டிஐ சட்டத்தின்கீழ் முகம் தெரியாத நபா்களிடம் வழங்க முடியாது.

சமூக ஆா்வலா்கள் என்ற போா்வையில் செயல்படும் நபா்களால் ஆா்டிஐ சட்டம் தவறாகப் பயன்படுத்தப்படுகிறது. தற்போதைய விவகாரத்தில் அரசியல் உள்நோக்கம் உள்ளது. ஒரு விஷயத்தை அறிந்து கொள்வதற்கான உரிமையைவிட தன்மறைப்பு நிலைக்கான உரிமை மேலானது. எனவே, சிஐசி-யின் உத்தரவை ரத்து செய்ய வேண்டும். சிஐசி-யின் உத்தரவை அனுமதித்தால், ஆா்டிஐ மனுக்களின்கீழ் தில்லி பல்கலைக்கழகத்தின் ஏராளமான மாணவா்களின் விவரங்களையும் வெளியிட வேண்டிய நிலை வரும்’ என்று துஷாா் மேத்தா தெரிவித்தாா். இதையடுத்து, மனு மீதான உத்தரவை தேதி குறிப்பிடாமல் நீதிபதி ஒத்திவைத்தாா்.