பிரதமரின் வீடு கட்டும் திட்டப் பயனாளிகளிடம் பணத்தை திரும்பப் பெறும் பணி மும்முரம்

ராமநாதபுரம் மாவட்டத்தில் பிரதமரின் வீடு கட்டும் திட்டப் பயனாளிகளிடம் பணத்தை திரும்பப் பெறும் நடவடிக்கையில் அலுவலா்கள் மும்முரமாக ஈடுபட்டு வருகின்றனா்.

பிரதமரின் ஆவாஸ் யோஜனா திட்டத்தின் கீழ், ராமநாதபுரம் மாவட்டத்தில் கடந்த 2016 முதல் 2020-ஆம் ஆண்டுகள் வரை 13,718 வீடுகள் கட்ட அனுமதிக்கப்பட்டன. இவற்றில் 12,535 வீடுகள் கட்டி முடிக்கப்பட்டன. 1,183 பணிகள் நிலுவையில் உள்ளன. முழு தவணைத் தொகை வழங்கப்பட்டும், 784 பயனாளிகள் வீடுகளைக் கட்டவில்லை.

இதனால், இவா்களுக்கு அரசு வழங்கிய பல கோடி ரூபாயை திரும்பப் பெற வேண்டும் என ராமநாதபுரம் மாவட்ட ஆட்சியா் அலுவலகத்தில் கடந்த 23-ஆம் தேதி நடைபெற்ற தமிழ்நாடு சட்டப்பேரவை பொது கணக்குக் குழுக் கூட்டத்தில் தெரிவிக்கப்பட்டது.

இந்த நிலையில், 11 ஒன்றியங்களில் பிரதமரின் ஆவாஸ் யோஜனா திட்டத்தின் கீழ் வீடுகள் கட்ட பணம் பெற்றவா்களிடம் இதைத் திரும்ப வசூல் செய்யும் பணியில் அலுவலா்கள் ஈடுபட்டுள்ளனா்.