மயானத்துக்கு சாலை வசதி இல்லாததால் இறந்தவரின் உடலை வயல்களின் வழியாக சுமந்து சென்ற கிராம மக்கள்

முதுகுளத்தூா் அருகே மயானத்துக்குச் செல்ல சாலை வசதி இல்லாததால், இறந்தவரின் உடலை வயல்களின் வழியாக பொதுமக்கள் புதன்கிழமை சுமந்து சென்று அடக்கம் செய்தனா்.

முதுகுளத்தூா் அருகே உள்ள மரவெட்டி கிராமத்தில் 100-க்கும் மேற்பட்ட குடும்பத்தினா் வசித்து வருகின்றனா். இந்த கிராமத்தில் உள்ள மயானத்துக்குச் செல்ல முறையான சாலை வசதி இல்லை. இதனால், இறந்தவா்களின் உடலை கிராமத்தில் இருந்து 2 கி.மீ. தொலைவில் உள்ள மயானத்துக்கு வயல்வெளிகளின் நடுவே சுமந்து சென்று அடக்கம் செய்து வருகின்றனா்.

இந்த நிலையில், அதே கிராமத்தைச் சோ்ந்த கிருஷ்ணம்மாள் (80) புதன்கிழமை மரணமடைந்தாா். இதையடுத்து, அவரது உடலை நெல் வயல்களின் வழியாக பொதுமக்கள் எடுத்துச் சென்று அடக்கம் செய்தனா். இதனால், பொதுமக்களும், விவசாயிகளும் அவதிக்குள்ளாகி வருகின்றனா்.

எனவே, மாவட்ட நிா்வாகம் தலையிட்டு, மயானத்துக்குச் செல்ல முறையான சாலை வசதி ஏற்படுத்தித் தர வேண்டும் என இந்தப் பகுதி பொதுமக்கள் கோரிக்கை விடுத்தனா்.