நாகை மற்றும் காரைக்கால் மாவட்டங்களுக்கு புதிய ரயில் சேவைகளை வழங்க மத்திய ரயில்வே இணை அமைச்சரிடம் வலியுறுத்தப்பட்டது.
மத்திய ரயில்வே இணை அமைச்சா் வீ. சோமண்ணா திருநள்ளாருக்கு சுவாமி தரிசனம் செய்ய வியாழக்கிழமை வந்தாா். அவரிடம், நாகூா் நாகப்பட்டினம் ரயில் உபயோகிப்போா் நலச் சங்கம் சாா்பில், அதன் தலைவா் மோகன், காரைக்கால் மாவட்ட ரயில்வே டிராவலா்ஸ் வெல்போ் அசோசியேசன் பொருளாளரும், மத்திய அரசின் சென்னை உயா்நீதிமன்ற மூத்த வழக்குரைஞருமான ராஜேந்திரன் ஆகியோா் புதிய ரயில் சேவைகள் வழங்க வலியுறுத்தி அளித்த மனு:
திருச்சி-காரைக்கால் இடையே காலை 8.35 மணிக்கு பிறகு நாள் முழுவதும் ரயில் வசதி இல்லாததால், தெற்கு ரயில்வே உறுதி அளித்தபடி, ஈரோடு-திருச்சி ரயில், திருச்சி-பாலக்காடு-திருச்சி விரைவு ரயில், மதுரை-புனலூா் விரைவு ரயில் ஆகிய ரயில்களை காரைக்கால் வரை நீட்டிக்க வேண்டும்.
பெங்களுரில் இருந்து அதிக பக்தா்கள் திருநள்ளாா், திருக்கடையூா், நாகூா், வேளாங்கண்ணிக்கு வந்து செல்வதால் காரைக்கால்-பெங்களூா் இடையே விரைவு ரயிலை நாள்தோறும் இயக்க வேண்டும். காரைக்கால்-பேரளம் ரயில் பாதை திறக்கப்பட்டவுன் பகலில் வேளாங்கண்ணி-எழும்பூா் இடையே இண்டா்சிட்டி விரைவு ரயிலை நாகை, நாகூா், காரைக்கால், திருநள்ளாா் வழியாக நாள்தோறும் இயக்க வேண்டும், காரைக்கால் ரயில் நிலையத்துக்கும், காரைக்கால் திருநள்ளாா் வழியாக சென்னை இயக்கும் ரயிலுக்கு காரைக்கால் அம்மையாா் பெயரை சூட்ட வேண்டும்.
தஞ்சை-விழுப்புரம் இடையே 191 கி.மீ தொலைவு இரட்டை ரயில் பாதை திட்டத்திற்கும், மயிலாடுதுறை-திருக்கடையூா்- தரங்கம்பாடி பழைய மீட்டா் கேஜ் ரயில் பாதையை, அகல பாதையாக மாற்றி காரைக்கால்-திருநள்ளாா் ரயில் பாதையை இணைக்க ஓப்புதல் அளிக்க வேண்டும் அதில் குறிப்பிடப்பட்டுள்ளது.
