புதுச்சேரி: `புதிய மதுபான ஆலை அனுமதியில் ஊழல்!’ -சிபிஐ விசாரணை கேட்டு ஆளுநரை சந்தித்த காங்கிரஸ்

புதுச்சேரியில் புதிதாக 8 மதுபான ஆலைகள் அமைக்க முதல்வர் ரங்கசாமி தலைமையிலான அமைச்சரவை ஒப்புதல் அளித்திருக்கும் நிலையில், அதில் முறைகேடு நடைபெற்றிருப்பதாக எம்.பி வைத்திலிங்கம் தலைமையில் ஆளுநரை சந்தித்து மனு அளித்திருக்கின்றனர் காங்கிரஸார். அதையடுத்து செய்தியாளர்களை சந்தித்த முன்னாள் முதல்வர் நாராயணசாமி, ``என்.ஆர்.காங்கிரஸ் – பா.ஜ.க கூட்டணி அரசு 8 அயல்நாட்டு மதுபானங்கள் தயாரிக்கும் தொழிற்சாலைக்கு தற்போது அனுமதி வழங்க முடிவு செய்திருக்கிறது.

ஆனால் ஏற்கெனவே ஆளுநராக இருந்த தமிழிசை அவர்கள், இந்த புதிய ஆலைகளுக்கு அனுமதி வழங்க மறுத்துவிட்டார். இதற்கிடையில் திடீரென 8 மதுபான ஆலைகளுக்கு திட்டக் குழுமத்தின் அனுமதியும், தொழில்துறையின் முதல் கட்ட அனுமதியும் வழங்கப்பட்டிருக்கிறது. இதற்கு இன்னும் ஆளுநரின் ஒப்புதல் பெறாத நிலையில், அமைச்சரவையில் வைத்து ஒப்புதல் பெற்றிருக்கிறார்கள். இதில் விதிமுறைகள் மீறப்பட்டிருக்கின்றன.

இந்த விவகாரத்தில் ஊழல் நடைபெற்றிருப்பதாக நினைக்கிறோம். பா.ஜ.க எம்.எல்.ஏ-வான கல்யாணசுந்தரம் `ஒரு ஆலைக்கு ரூ.10 கோடி லஞ்சம் வாங்கியிருக்கின்றனர்’ என்று சட்டப்பேரவையிலேயே குற்றம் சுமத்தியிருந்தார். அதற்கு இதுவரை முதல்வர் உள்ளிட்ட யாரும் மறுப்பு தெரிவிக்கவில்லை. அதிகமாக நீர் உறிஞ்சும் தொழிற்சாலைகளுக்கு அனுமதி இல்லை என்ற விதிகளை மீறி தற்போது அனுமதி தரப்பட்டிருக்கிறது. யாருடைய உத்தரவின் பேரில் நகரமைப்பு குழுமத்தின் அனுமதி கொடுக்கப்பட்டது ?

இதற்காக குளோபல் டெண்டரை வைக்காமல், ரகசியமாக அனுமதி கொடுக்கப்பட்டது ஏன் ? இதன்மூலம் பலகோடி ரூபாய் ஊழல் செய்வதற்கு ஆளும் கட்சியினர் திட்டமிட்டிருக்கின்றனர். புதிய மதுபான ஆலைகள் அமைக்கும் அமைச்சரவையின் முடிவுக்கு ஆளுநர் அனுமதி கொடுக்கக் கூடாது. இந்த விவகாரத்தில் நடைபெற்றிருக்கும் ஊழல் குறித்து விசாரிக்க ஆளுநர் சி.பி.ஐ விசாரணைக்கு உத்தரவிட வேண்டும்” என்றார்.