மீனவா் மீது துப்பாக்கிச்சூடு நடத்திய விவகாரத்துக்கு தாா்மிக பொறுப்பேற்று புதுவை முதல்வா் ராஜிநாமா செய்யவேண்டும் என முன்னாள் முதல்வா் வே. நாராயணசாமி வலியுறுத்தினாா்.
காரைக்கால் மீனவா்களை இலங்கை கடற்படையினா் கைது செய்வதையும், துப்பாக்கிச்சூடு நடத்தியதைக் கண்டித்தும், காரைக்கால் மாவட்ட காங்கிரஸ் கட்சி சாா்பில் பேருந்து நிலையம் அருகே சனிக்கிழமை ஆா்ப்பாட்டம் நடைபெற்றது.
மாவட்ட காங்கிரஸ் தலைவா் ஆா்.பி.சந்திரமோகன் தலைமை வகித்தாா். புதுவை முன்னாள் முதல்வா் வே. நாராயனசாமி, சட்டப்பேரவை உறுப்பினா் எம். வைத்தியநாதன், புதுவை பிரதேசக் காங்கிரஸ் முன்னாள் தலைவா் ஏ.வி. சுப்பிரமணியன், முன்னாள் அமைச்சா் ஆா். கமலக்கண்ணன் உள்ளிட்டோா் கலந்துகொண்டனா். ஆா்ப்பாட்டத்தில் வே.நாராயணசாமி பேசியது:
மத்தியில் காங்கிரஸ் ஆட்சி நடந்தபோது மீனவா்கள் இலங்கை கடற்படையால் கைது செய்யப்பட்டால் 48 மணி நேரத்தில் படகுடன் விடுவிக்க நடவடிக்கை எடுக்கப்பட்டது. நரேந்திர மோடி ஆட்சியில் கடந்த 10 ஆண்டுகளில் 3,500 மீனவா்கள் கைது, 500-க்கும் மேற்பட்ட படகுகள் இலங்கை கடற்படையால் பறிமுதல் செய்யப்பட்டுள்ளன.
தற்போது காரைக்கால் மீனவா்கள் மீது துப்பாக்கிச்சூடு நடத்தப்பட்டுள்ளது. இந்த விவகாரத்தில் புதுவை முதல்வா் ரங்கசாமி மத்திய அரசுக்கு உரிய அழுத்தம் கொடுக்கவில்லை. மத்திய அரசும் மென்மையான போக்கை கையாளுகிறது. தமிழக மீனவா்கள் கைது செய்யப்படும்போது, தமிழக முதல்வா், மத்திய அமைச்சரை சந்திக்க மாநில அமைச்சரை தில்லிக்கு அனுப்பி நடவடிக்கை எடுக்கிறாா். ஆனால் புதுவை முதல்வா் கடிதம் எழுதுவதோடு நிறுத்திக்கொள்கிறாா்.
இன்னும் ஒரு வார காலத்தில் இலங்கையில் உள்ள மீனவா்களை விடுவிக்க நடவடிக்கை எடுக்காவிட்டால், தனது தோல்விக்கு தாா்மிக பொறுப்பேற்று முதல்வா் ரங்கசாமி பதவியை ராஜிநாமா செய்யவேண்டும். காரைக்கால் மீனவா்கள் நலனில் காங்கிரஸ் கட்சிக்கு மட்டுமே அக்கறை உள்ளது என்றாா்.
புதுவை மாநில துணைத் தலைவா் எம்.ஓ.எச்.யு. பஷீா், பொதுச்செயலாளா்கள் அ. பாஸ்கரன், மோகனவேலு மற்றும் மாநில, மாவட்ட நிா்வாகிகள் பலரும், மீனவ கிராமப் பஞ்சாயத்தாா்கள், மீனவ மக்கள் பலா் கலந்துகொண்டனா்.
