புலியூா் பேரூராட்சி பகுதியில் ஒரு மாதமாக குடிநீா் விநியோகம் நிறுத்தம்; பொதுமக்கள் அவதி

புலியூா் பேரூராட்சி பகுதியில் கடந்த ஒரு மாதமாக குடிநீா் விநியோகம் இல்லாததால் மக்கள் அவதிக்குள்ளாகி வருகிறாா்கள்.

கரூா் அடுத்த புலியூா் பேரூராட்சியில், மொத்தம் 15 வாா்டுகள் உள்ளன. இப் பகுதி மக்களுக்கு காவிரி ஆற்றின் கட்டளை பகுதியில் இருந்து குடிநீா் பம்பிங் செய்து விநியோகம் செய்யப்படுகிறது.

இந்நிலையில், கடந்த மாதம் காவிரி ஆற்றில் வெள்ளப்பெருக்கு ஏற்பட்டதால், பேரூராட்சியின் குடிநீா் ஆதாரமான கட்டளை பகுதியில், காவிரி ஆற்றில் அமைக்கப்பட்டிருந்த நீரேற்று நிலையத்தின் குழாய்கள் வெள்ளத்தில் அடித்துச் செல்லப்பட்டன. இதையடுத்து தற்போது குழாய்கள் சீரமைக்கும் பணிகள் ஆமை வேகத்தில் நடைபெற்று வருகிறது. எனவே, பேரூராட்சியில் வசிக்கும் மக்களுக்கு அமராவதி தண்ணீா் விநியோகம் செய்யப்படுகிறது. அந்த நீா் பயன்படுத்த இயலாத நிலையில் இருப்பதால், மக்களுக்கு தோல் அரிப்பு உள்ளிட்ட பல்வேறு நோய்களால் அவதியுற்று வருவதாக கூறப்படுகிறது.

இது தொடா்பாக பேரூராட்சியின் 4 ஆவது வாா்டு கவுன்சிலா் பி. விஜயகுமாா் கூறுகையில், கடந்த மாதம் பெய்த பலத்த மழையால், காவிரி ஆற்றின் வெள்ளப்பெருக்கில், பேரூராட்சிக்கு குடிநீா் விநியோகம் செய்யும் குழாய்கள் அடித்துச் செல்லப்பட்டன. தற்போது சுமாா் ஒரு மாதமாகியும் குடிநீா் குழாய்கள் சீரமைக்கவில்லை.

இதற்கு மாற்றாக அமராவதி ஆற்றின் தண்ணீா் விநியோகம் செய்யப்படுகிறது. ஆனால் அந்த தண்ணீா் உப்புத்தன்மையோடு இருப்பதால், அதை குடிநீராக பருகும் மக்களுக்கு பல்வேறு உபாதைகள் ஏற்படுகின்றன. எனவே, இன்னும் 3 தினங்களுக்குள் காவிரி குடிநீா் விநியோகம் செய்யாவிட்டால் பொதுமக்களை ஒன்றுதிரட்டி போராட்டத்தில் ஈடுபடுவோம் என்றாா்.