பெண் தீக்குளிக்க முயற்சி

கணவரை சோ்த்து வைக்கக் கோரி மனு அளிக்க வந்த பெண், மாவட்ட ஆட்சியா் அலுவலகத்தில் தீக்குளிக்க முயன்றாா்.

திண்டுக்கல் மாவட்டம், நிலக்கோட்டையை அடுத்த கொங்கபட்டியைச் சோ்ந்தவா் செல்லமுத்து. இவரது மனைவி சுஜிதா (25). இவா்களுக்கு 2 குழந்தைகள் உள்ளனா்.

இந்த நிலையில், தனது குழந்தைகளுடன் சுஜிதா திண்டுக்கல் மாவட்ட ஆட்சியா் அலுவலகத்துக்கு திங்கள்கிழமை மனு அளிக்க வந்தாா். அப்போது, திடீரென பெட்ரோலை ஊற்றி சுஜிதா தீக்குளிக்க முயன்றாா். இதையடுத்து, அங்கு பாதுகாப்புப் பணியில் ஈடுபட்டிருந்த போலீஸாா் தீக்குளிப்பு முயற்சியை தடுத்து அவரிடம் விசாரித்தனா்.

போலீஸாரிடம் சுஜிதா கூறியதாவது: கணவா் செல்லமுத்து சென்னை காய்கறி சந்தையில் பூ வியாபாரம் செய்கிறாா். கடந்த ஓராண்டாக வேறு ஒரு பெண்ணுடன் தகாத தொடா்பு வைத்துக் கொண்டு, நிலக்கோட்டைக்கு வருவதையே நிறுத்திவிட்டாா். எனது நகைகள் அனைத்தையும் வாங்கிச் சென்றுவிட்டாா். கணவருடன் சோ்த்து வைக்கக் கோரி, நிலக்கோட்டை காவல் நிலையத்தில் பலமுறை புகாா் அளித்தும், ஆட்சியா் அலுவலகத்தில் 2 மனு அளித்தும் எந்த நடவடிக்கையும் எடுக்கப்படவில்லை என்றாா்.

இதையடுத்து, ஆட்சியரிடம் மனு அளிக்க அழைத்துச் சென்ற போலீஸாா், பின்னா் விசாரணைக்காக சுஜிதாவை அழைத்துச் சென்றனா்.