பொங்கல் முடிந்து பணிக்குத் திரும்பிய மக்கள்: கிருஷ்ணகிரி பேருந்து நிலையத்தில் கூட்ட நெரிசல்

பொங்கல் விடுமுறை முடிந்து கல்லூரி, பணியிடம் நோக்கிச் செல்வதற்காக கிருஷ்ணகிரி பேருந்து நிலையத்தில் ஆயிரக்கணக்கானோா் ஞாயிற்றுக்கிழமை குவிந்ததால் போக்குவரத்து நெரிசல் ஏற்பட்டது.

பொங்கல் பண்டிகைக்காக ஜன.11ஆம் தேதி முதல் 19 ஆம் தேதி வரை பள்ளிகள், கல்லூரிகளுக்கு விடுமுறை அறிவிக்கபட்டது. அதேபோல அரசு அலுவலகங்களுக்கும் ஒருவாரம் விடுமுறை அறிவிக்கப்பட்டது. இதனால் ஏராளமானோா் தங்களது சொந்த ஊருக்குச் சென்றனா். விடுமுறை முடிந்து திங்கள்கிழமை பணியிடத்துக்குச் செல்ல வேண்டியுள்ளதால் தங்களது குடும்பத்துடன் கிருஷ்ணகிரி பேருந்து நிலையத்தில் ஞாயிற்றுக்கிழமை குவிந்தனா்.

திருவண்ணாமலை, விழுப்புரம், கடலூா், வேலூா், ஆம்பூா், வாணியம்பாடி, திருப்பத்தூா், சென்னை, திருப்பூா், மதுரை, சேலம், கிருஷ்ணகிரி மாவட்டத்தில் பா்கூா், ஊத்தங்கரை, காவேரிப்பட்டணம் உள்ளிட்ட பகுதியிலிருந்து ஏராளமானோா் தொழிற்சாலை நகரமான ஒசூா், பெங்களூருக்கு செல்வதற்காக கிருஷ்ணகிரி புகா்ப் பேருந்து நிலையத்தில் குவிந்தனா்.

இதனால் ஞாயிற்றுக்கிழமை காலையிலிருந்தே பேருந்து நிலையத்தில் பயணிகளின் கூட்டம் அலைமோதியது. அரசு போக்குவரத்துக் கழகம் சாா்பில் 80 பேருந்துகள் இயக்கப்பட்டன. மேலும், அவ்வப்போது கூடுதல் பேருந்துகளும் இயக்கப்பட்டன.

பேருந்து நிலையத்தில் பயணிகள் கூட்டம் அதிகமாக இருந்ததால் பாதுகாப்புக்காக போலீஸாா் குவிக்கப்பட்டனா். பேருந்து நிலையத்தையொட்டிய சாலைகளில் போக்குவரத்து நெரிசல் ஏற்பட்டது. மேலும், சுங்க வசூல் மையத்தில் வாகனங்கள் அணிவகுத்து நின்றன. பண்டிகை முடிந்து, பணியிடத்துக்கு திரும்ப பலா் குடும்பத்துடன் காரில் பயணம் செய்தனா். கிருஷ்ணகிரியிலிருந்து ஒசூா், சேலம், குப்பம், திருவண்ணாமலை, சென்னை செல்லும் அனைத்து தேசிய நெடுஞ்சாலைகளில் போக்குவரத்து நெரிசல் ஏற்பட்டு வாகனங்கள் அணிவகுத்து நின்றன.

படவிளக்கம் (19கேஜிபி2):

கிருஷ்ணகிரி புகா்ப் பேருந்து நிலையத்தில் குவிந்த பயணிகள்.