பொது சிவில் சட்டம்: திருமணம் செய்யாமல் சேர்ந்து வாழ்வோர் பதிவு செய்வது கட்டாயம்!

பாஜக ஆளும் உத்தரகண்டில் பொது சிவில் சட்டம் அமலானதைத் தொடர்ந்து, திருமணம் செய்யாமல் சேர்ந்து வாழ்வோர் பதிவு செய்வது கட்டாயம் என்று தெரிவிக்கப்பட்டுள்ளது.

இது குறித்து, உத்தரகண்ட் முதல்வர் புஷ்கா் சிங் தாமி கூறியதாவது: ”திருமணம் செய்யாமல் சேர்ந்து வாழும்(லிவ் - இன் டுகெதர் உறவு) மக்களின் தனிப்பட்ட உரிமைகளை நாங்கள் பறிக்கவில்லை. அத்தகைய உறவில் வாழும் இணையர்களின் பாதுகாப்பை நாங்கள் உறுதி செய்கிறோம்.

திருமணம் செய்யாமல் சேர்ந்து வாழ்வோர் கொல்லப்பட்ட சம்பவங்கள் பல பதிவாகியுள்ளன. தில்லியில் கடந்த 2022-ஆம் ஆண்டு பதிவான ‘ஸ்ரத்தா - வாக்கர் கொலை வழக்கில்’, லிவ் இன் டுகெதர் தம்பதிக்குள் ஏற்பட்ட தகராறில், அந்த தம்பதிகளுள் ஒருவர் இன்னொருவரை கொன்ற கொடூரமும் அரங்கேறியுள்ளது.

இந்த நிலையில், அதே போன்ற வழக்குகள் பதிவாகக் கூடாதென்பதற்கவே இத நடைமுறை கடைபிடிக்கப்படுகிறது” என்று பொருள்பட கூறியுள்ளார் உத்தரகண்ட் முதல்வர்.

பொது சிவில் சட்டத்திலுள்ளஅம்சங்கள் என்னென்ன?

உத்தரகண்டில் பழங்குடியினா் தவிா்த்து பிற மக்கள் அனைவருக்கும் பொது சிவில் சட்டம் பொருந்தும். இச்சட்டத்தின்படி, திருமணப் பதிவு மட்டுமன்றி திருமணம் செய்யாமல் சோ்ந்து வாழ்வோரும் அரசிடம் முறையாகப் பதிவு செய்து கொள்வது கட்டாயமாகும். இணையவழியில் இப்பதிவை மேற்கொள்ள முடியும்.

விவாகரத்துக்கான காரணங்கள், மறுமணம், ஜீவனாம்சம் தொடா்பாக பொது விதிமுறைகளை உறுதிசெய்யும் இச்சட்டம், பலதார மணம் மற்றும் ஹலாலா நடைமுறையை தடை செய்கிறது.

பாலின சமத்துவத்தை முக்கிய அம்சமாக கொண்ட இச்சட்டம், ஆண்கள்-பெண்களுக்கு ஒரே போன்ற குறைந்தபட்ச திருமண வயது, ஆண்-பெண் குழந்தைகளுக்கு சமமான சொத்துரிமையை உறுதி செய்கிறது. செல்லுபடியாகாத திருமணத்தில் பிறந்த குழந்தைகளையும் சட்டபூா்வ வாரிசாக கருத வழிவகை செய்வதோடு, உயில் தயாரிப்பு நடைமுறைகளையும் எளிதாக்குகிறது.