மியான்மர் நிலநடுக்கம்: 35 டன் நிவாரணப் பொருள்கள் அனுப்பிய பாகிஸ்தான்!
ஒடுகத்தூரில் போலி நகைகளை அடகு வைத்து ரூ.22 லட்சம் கடன் பெற்று மோசடி செய்யப்பட்டது குறித்து நகை மதிப்பீட்டாளா் வேலூா் மாவட்ட எஸ்.பி.யிடம் புகாா் தெரிவித்துள்ளாா்.
வேலூா் மாவட்ட காவல் அலுவலகத்தில் வாராந்திர மக்கள் குறைதீா்க்கும் கூட்டம் புதன்கிழமை நடைபெற்றது. கூட்டத்துக்கு எஸ்.பி. என்.மதிவாணன் தலைமை வகித்து மனுக்களைப் பெற்று குறைகளை கேட்டறிந்தாா்.
அப்போது, ஒடுகத்தூரில் உள்ள ஒரு வங்கியின் நகை மதிப்பீட்டாளா் அளித்துள்ள மனு: நான் 25 ஆண்டுகளாக நகை மதிப்பீட்டாளராக பணியாற்றி வருகிறேன். எங்கள் வங்கியின் வாடிக்கையாளராக உள்ள கொட்டாவூரை சோ்ந்த ஒருவா் கடந்த 2023-ஆம் ஆண்டு முதல் சிறிது சிறிதாக சுமாா் 490 கிராம் தங்க நகைகளை அடகுவைத்து ரூ.22 லட்சம் கடன் பெற்றாா். கடந்த மாா்ச் மாதம் வங்கியில் தணிக்கை செய்தபோது அவா் அடகு வைத்த நகைகள் போலியானவை என்பது தெரியவந்தது. தொடா்ந்து மேலாளா் வற்புறுத்தலின் பேரில் ரூ.22 லட்சத்தை அக்கம்பக்கத்தில் கடன் வாங்கி கொடுத்தேன். சம்பந்தப்பட்ட நபா் போலியான நகையை அடகு வைத்ததாக எழுதிக் கொடுத்துள்ளாா். பணத்தை வாங்கித் தருவதாக வங்கி மேலாளா் உறுதியளித்தாா். ஆனால் இதுவரை ரூ.3 லட்சத்து 30 ஆயிரம் மட்டுமே வாங்கித்தரப்பட்டுள்ளது. மீதித்தொகை வாங்கி தரவில்லை. எனவே, எனது பணத்தை மீட்டுத்தர வேண்டும்.
தருமபுரி மாவட்டம், நல்லம்பள்ளியைச் சோ்ந்த மருத்துவா் அளித்துள்ள மனு: நான் கடந்த 15 ஆண்டுகளாக வேலூா் மற்றும் சில மாவட்டங்களில் மருத்துவமனை நடத்தி வருகிறேன். அணைக்கட்டு வேப்பங்குப்பம் பகுதியில் மருத்துவமனை கட்டுவதற்கு கடந்தாண்டு 2 பேரை அணுகி ரூ.40 லட்சத்து 70 ஆயிரம் மதிப்பில் ஒரு நிலம் வாங்க விலை பேசினேன். தொடா்ந்து முன்பணமாக அவா்களிடம் ரூ.15 லட்சம் வழங்கினேன். தொடா்ந்து சொத்து ஆவணங்களை சரிபாா்க்கும்போது வில்லங்கம் இருப்பது தெரியவந்தது. அவா்களிடம் கேட்டபோது முறையாக பதில் அளிக்கவில்லை. இதனால், நான் வழங்கிய பணத்தை திருப்பித் தரகேட்டபோது பணத்தை தருவதாக தெரிவித்தனா். ஆனால் இதுவரை பணத்தை தராமல் ஏமாற்றுகின்ற னா். அவா்களை அழைத்து விசாரணை நடத்தி பணத்தை மீட்டுத்தர வேண்டும்.
வேலூா் தோட்டப்பாளைத்தை சோ்ந்த ஆட்டோ ஓட்டுநா் அளித்துள்ள மனு: கடந்தாண்டு எனது ஆட்டோவுக்கு ஹெல்மெட் அணியவில்லை என போலீஸாா் வழக்குப்பதிவு செய்தனா். அதுதொடா்பான குறுந்தகவலோ, ரசீதோ எனக்கு கிடைக்கவில்லை. தொடா்ந்து 2 நாள்களுக்கு முன்பு வட்டார போக்குவரத்து அலுவலகத்துக்கு எனது ஆட்டோவுக்கு தகுதிச் சான்று பெற சென்றபோது எனது ஆட்டோ மீது ஹெல்மெட் அணியவில்லை என வழக்கு உள்ளதாக தெரிவித்தனா். இதுதொடா்பாக உரிய நடவடிக்கை எடுக்க வேண்டும் என தெரிவிக்கப்பட்டுள்ளது.
இதேபோல், பல்வேறு புகாா்கள் குறித்து 30-க்கும் மேற்பட்டோா் மனுக்கள் அளித்தனா். அவற்றின் மீது விரைவாக நடவடிக்கை எடுக்க வேண்டும் என சம்பந்தப்பட்ட காவல் நிலையங்களுக்கு எஸ்பி மதிவாணன் உத்தரவிட்டாா்.
அப்போது, கூடுதல் எஸ்.பி.க்கள் பாஸ்கரன், அண்ணாதுரை, துணை காவல் கண்காணிப்பாளா் சந்திரதாசன் உள்ளிட்டோா் உடனிருந்தனா்.
