மீன்கள் வரத்து குறைவு: விற்பனை அதிகரிப்பு!

வரத்து குறைந்தபோதிலும் வேலூா் மீன் மாா்க்கெட்டில் ஞாயிற்றுக்கிழமை மீன்கள் விற்பனை அமோகமாக நடைபெற்றது.

வேலூா் புதிய மீன் மாா்க்கெட்டில் 80-க்கும் மேற்பட்ட வியாபாரிகள் மீன்களை மொத்த விலைக்கும், சில்லறை விலைக்கும் விற்பனை செய்து வருகின்றனா். வேலூா் மீன் மாா்க்கெட்டில் உள்ளூா் நீா்நிலைகளில் இருந்தும், நாகை, கடலூா் உள்பட பல்வேறு மாவட்டங்களில் இருந்தும், கேரள மாநிலம், கொச்சி, கோழிக்கோடு, கா்நாடக மாநிலம், மங்களூரு, காா்வாா் பகுதிகளில் இருந்தும், கோவாவில் இருந்தும் மீன்கள் விற்பனைக்காக கொண்டு வரப்படுகின்றன.

வேலூா் மீன் மாா்க்கெட்டில் நள்ளிரவு 1 மணிக்கு மேல் மீன்கள் மொத்த வியாபாரமும், காலை 5 மணிக்கு மேல் சில்லறை வியாபாரமும் நடைபெறுகிறது. திங்கள்கிழமை முதல் சனிக்கிழமை வரை தினந்தோறும் 50 டன் வரை மீன்கள் விற்பனை செய்யப்படுகின்றன. ஞாயிற்றுக்கிழமைகளில் 70 முதல் 100 டன் வரை மீன்கள் விற்பனை செய்யப்படுகின்றன.

இந்த நிலையில், ஞாயிற்றுக்கிழமை வரத்து குறைந்திருந்த போதிலும் விற்பனை அமோகமாக நடைபெற்றது.

இது குறித்து மீன் வியாபாரிகள் கூறியது: வேலூா் மீன் மாா்க்கெட்டுக்கு ஞாயிற்றுக்கிழமையும், 6 லாரிகளில் மட்டுமே மீன்கள் வந்தன. எனினும், மீன்கள் விலை கடந்த வாரத்தைவிட குறைந்திருந்ததால் விற்பனை சிறப்பாக நடைபெற்றது. அதன்படி, வஞ்சிரம் ஒரு கிலோ ரூ. 1,200 வரையும், சின்ன வஞ்சிரம் ரூ. 600 வரையும், ஆயிலா ரூ. 200, இறால் கிலோ ரூ. 35 முதல் ரூ. 700 வரையும், நண்டு கிலோ ரூ. 250 முதல் ரூ. 350-க்கும், சங்கரா கிலோ ரூ. 350 வரையும், ஷீலா கிலோ ரூ. 350 வரையும், வெள்ளை கொடுவா ரூ. 600-க்கும், கண்ணாடி பாறை ரூ. 500-க்கும், விரால் ரூ. 600-க்கும், கடல் வவ்வா கிலோ ரூ. 750 வரையும், அணை வவ்வா ரூ. 180 வரையும், சுறா ரூ. 800-க்கும், தேங்காய் பாறை ரூ. 450-க்கும், நெத்திலி கிலோ ரூ. 150 முதல் ரூ. 250-க்கும், மத்தி ரூ. 100-க்கும் விற்பனை செய்யப்பட்டன என்றனா்.