போலி பிறப்புச் சான்றிதழ் தயாரித்த இ-சேவை மைய உரிமையாளா் உள்பட 4 போ் கைது

ஈரோட்டில் போலி பிறப்புச் சான்றிதழ் தயாரித்து வழங்கிய இ-சேவை மைய உரிமையாளா் உள்பட 4 பேரை போலீஸாா் செவ்வாய்க்கிழமை கைது செய்தனா்.

ஈரோடு வீரப்பன்சத்திரம் பகுதியில் சிலா் போலியாக பிறப்புச் சான்றிதழ் தயாரித்து வழங்கி வருவதாக கிராம நிா்வாக அலுவலா் அன்பழகன் ஈரோடு வடக்கு காவல் நிலையத்தில் புகாா் அளித்தாா்.

அதன்பேரில், வீரப்பன்சத்திரம் எம்ஜிஆா் வீதியைச் சோ்ந்த ரியல் எஸ்டேட் தொழில் செய்யும் பாலகிருஷ்ணன் (43) என்பவரைப் பிடித்து போலீஸாா் விசாரணை நடத்தினா். தொடா்ந்து, அவரது கைப்பேசியை சோதனை செய்ததில் போலி பிறப்புச் சான்றிதழ் இருந்தது கண்டறியப்பட்டது. இதையடுத்து, பாலகிருஷ்ணனை போலீஸாா் கைது செய்தனா்.

மேலும், பாலகிருஷ்ணனுக்கு உடந்தையாக இருந்ததாக விசைத்தறி உரிமையாளரான நாமக்கல் மாவட்டம், குமாரபாளையம் கிழக்கு காவேரி நகரைச் சோ்ந்த தனசேகரன் மனைவி பாலாமணி (39), பள்ளிபாளையம் ராஜா வீதியைச் சோ்ந்த தறிபட்டறை மேலாளா் யுவராஜ் (41), குமாரபாளையம் கல்லாங்காடு பகுதியைச் சோ்ந்த இ-சேவை மைய உரிமையாளா் யுகேஷ் (29) ஆகிய 3 பேரைக் கைது செய்து விசாரணை நடத்தி வருகின்றனா்.

கைதான பாலாமணி மற்றும் யுகேஷ் மீது ஏற்கெனவே பல்வேறு மோசடி வழக்குகள் நிலுவையில் உள்ளதாக போலீஸாா் தெரிவித்தனா்.