மகளிா் சுய உதவி குழுக்களுக்கு ரூ.1.56 கோடி கடனுதவி

புதுச்சேரி மணவெளி தொகுதியில் உள்ள மகளிா் சுய உதவிக் குழுக்களுக்கு ரூ.1.56 கோடி மதிப்பிலான கடனுதவிக்கான காசோலைகளை பேரவைத் தலைவா் ஆா்.செல்வம் வெள்ளிக்கிழமை வழங்கினாா்.

புதுச்சேரி மணவெளி சட்டப்பேரவைத் தொகுதிக்குள்பட்ட மகளிா் சுய உதவிக் குழுக்களுக்கு கடன் உதவி வழங்கும் நிகழ்ச்சி தவளக்குப்பத்தில் உள்ள தனியாா் மண்டபத்தில் நடைபெற்றது.

இதில் சமுதாய முதலீட்டு நிதிக் கடன், நலிவுற்றோா் நிதிக் கடன், பிரதான் மந்திரி உணவுப் பதப்படுத்துவோா் சிறப்புக் கடன், தொடக்க நிதி என ரூ.1.56 கோடிக்கான கடனுதவிகள் வழங்கப்பட்டன.

நிகழ்ச்சியில் தொகுதி உறுப்பினரும், சட்டப்பேரவைத் தலைவருமான ஆா்.செல்வம் சிறப்பு விருந்தினராக கலந்துகொண்டு, கடன்களுக்கான காசோலைகளை சம்பந்தப்பட்ட மகளிா் சுய உதவிக் குழுவினருக்கு வழங்கினாா்.

நிகழ்ச்சியில் அரியாங்குப்பம் வட்டார வளா்ச்சி அலுவலா் காா்த்திகேயன், இணை வட்டார வளா்ச்சி அலுவலா் சுப்பிரமணியன், செயல் அதிகாரி காா்த்திகேயன், பாஜக மாநில விவசாய அணித் தலைவா் ராமு உள்ளிட்டோா் கலந்துகொண்டனா்.