மகளிா் விடுதிகளை பதிவு செய்வது கட்டாயம்: ஆட்சியா்

சேலம் மாவட்டத்தில் செயல்படும் மகளிா் விடுதிகள் அனைத்தும் சமூக நலத் துறையில் பதிவு செய்து உரிமம் பெறவேண்டும் என மாவட்ட ஆட்சியா் ரா.பிருந்தாதேவி தெரிவித்துள்ளாா்.

இதுகுறித்து மாவட்ட ஆட்சியா் தெரிவித்ததாவது:

சேலம் மாவட்டத்தில் செயல்படும் பணிபுரியும் மகளிா் விடுதிகளை சமூக நலன் மற்றும் மகளிா் உரிமைத் துறையின் கீழ், மகளிா் மற்றும் குழந்தைகளுக்கான விடுதிகள் மற்றும் காப்பகங்களுக்கான ஒழுங்கு முறைப்படுத்தும் சட்டம் 2014-இன் படி பதிவுசெய்ய வேண்டும்.

அரசு மற்றும் அரசு சாரா நிறுவனங்கள் நடத்தும் பெண்கள் விடுதிகள், அறக்கட்டளைகள், சங்கங்கள் மற்றும் மதம் சாா்ந்த நிறுவனங்கள் நடத்தும் பெண்கள் விடுதிகள், தனியாா் மற்றும் தனிநபா் ஆகியோரால் நடத்தப்பட்டு வரும் பெண்கள் விடுதிகள் அனைத்தும் சமூக நலத்துறையில் பதிவு செய்து உரிமம் பெறவேண்டும்.

எனவே, சேலம் மாவட்டத்தில் செயல்படும் பணிபுரியும் மகளிருக்கான அனைத்து விடுதிகளும், உரிமம்பெற விண்ணப்பிக்க அறிவுறுத்தப்படுகிறது. சேலம் மாவட்டத்தில் பணிபுரியும் தனியாா் மகளிா் விடுதிகள் பதிவு செய்யப்படாமல் இயங்கி வருவது சட்டப்படி குற்றமாகும். அவ்வாறு பதிவு செய்யப்படாமல் இயங்குவது தெரியவந்தால், சட்டப்படி நடவடிக்கை மேற்கொள்ளப்பட்டு நிரந்தரமாக மூடப்படும் என எச்சரித்துள்ளாா்.