மகா கும்பமேளா: ராஜஸ்தான், ம.பி. முதல்வா்கள் புனித நீராடல்

உத்தர பிரதேச மாநிலம், பிரயாக்ராஜில் நடைபெற்றுவரும் மகா கும்பமேளாவில் ராஜஸ்தான் முதல்வா் பஜன்லால் சா்மா, மத்திய பிரதேச முதல்வா் மோகன் யாதவ் ஆகியோா் சனிக்கிழமை புனித நீராடினா்.

உலகின் மிகப் பெரிய ஆன்மிக-கலாசார நிகழ்வாக கருதப்படும் மகா கும்பமேளா, பிரயாக்ராஜில் கங்கை, யமுனை, சரஸ்வதி (புராண நதி) ஆகியவை கூடும் திரிவேணி சங்கமத்தில் கடந்த ஜனவரி 13-ஆம் தேதிமுதல் (பெளஷ பெளா்ணமி) நடைபெற்று வருகிறது.

இந்தியா மட்டுமன்றி உலகம் முழுவதும் இருந்து கோடிக்கணக்கான பக்தா்கள் வருகை தந்து, புனித நீராடி வருகின்றனா். மத்திய அமைச்சா்கள், பல்வேறு மாநிலங்களின் முதல்வா்கள், வெளிநாட்டு தூதரக அதிகாரிகள் உள்ளிட்டோரும் புனித நீராடுகின்றனா்.

பிரதமா் நரேந்திர மோடி கடந்த பிப்ரவரி 5-ஆம் தேதி திரிவேணி சங்கமத்தில் நீராடி, கங்கை வழிபாடு மேற்கொண்டாா்.

இந்நிலையில், ராஜஸ்தான் முதல்வா் பஜன்லால் சா்மா, தனது மனைவியுடன் திரிவேணி சங்கமத்தில் சனிக்கிழமை புனித நீராடினாா்.

‘நமது கலாசாரம், பாரம்பரியத்தின் அடையாளமான மகா கும்பமேளாவில் புனித நீராடுவது நமது அதிருஷ்டம். இத்தகைய தெய்வீகம் நிறைந்த பிரம்மாண்டமான நிகழ்வுக்கான ஏற்பாடுகளைச் செய்த பிரதமா் மோடி, முதல்வா் யோகி ஆதித்யநாத்துக்கு நன்றி தெரிவிக்கிறேன்’ என்றாா் அவா்.

இதேபோல், பிரயாக்ராஜுக்கு சனிக்கிழமை வந்த மத்திய பிரதேச முதல்வா் மோகன் யாதவ், திரிவேணி சங்கமத்தில் தனது மனைவி சீமாவுடன் புனித நீராடி வழிபட்டாா்.

முன்னாள் மத்திய அமைச்சா் அனுராக் சிங் தாக்குா் தனது மனைவி ஷஃபாலி தாக்குருடன் மகா கும்பமேளாவில் சனிக்கிழமை பங்கேற்றாா். வழிபாடுகளுக்குப் பிறகு திரிவேணி சங்கமத்தில் அவா்கள் இருவரும் புனித நீராடினா்.

மகா சிவராத்திரி தினமான பிப்ரவரி 26-ஆம் தேதி வரை மகா கும்பமேளா நடைபெறவுள்ளது.