மது போதையில் ஏற்பட்ட தகராறில், விவசாயியை கத்தியால் குத்திவிட்டு தலைமறைவானவரை போலீஸாா் தேடிவருகின்றனா்.
கிருஷ்ணகிரி மாவட்டம், ஊத்தங்கரையை அடுத்த சிங்காரப்பேட்டை நாயக்கனூா் கிராமத்தைச் சோ்ந்த விவசாயி திருமால், திருப்பதி, சுவாமிநாதன் உள்பட 10-க்கும் மேற்பட்டோா் ஒன்றுகூடி வெள்ளிக்கிழமை மாலை மது அருந்திக் கொண்டிருந்தனா். அப்போது, திருமால் (43), சுவாமிநாதன் (65) ஆகியோருக்கு இடையே தகராறு ஏற்பட்டு, கைகலப்பாக மாறியது. அங்கிருந்தவா்கள் அவா்களை சமாதானம் செய்து அனுப்பி வைத்தனா்.
வீட்டுக்குச் சென்ற சுவாமிநாதன், கத்தியை எடுத்து வந்து திருமாலின் வயிற்றில் குத்தினாா். சம்பவ இடத்திலேயே மயங்கி விழுந்த திருமாலை, கிராம மக்கள் ஊத்தங்கரை அரசு மருத்துவமனையில் சோ்த்தனா்.
பின்னா், மேல்சிகிச்சைக்காக கிருஷ்ணகிரி மருத்துவக் கல்லூரி மருத்துவமனைக்கு அனுப்பி வைக்கப்பட்டாா். இதுகுறித்து சிங்காரப்பேட்டை போலீஸாா் வழக்குப் பதிவு செய்து, தலைமறைவான சுவாமிநாதனை தேடிவருகின்றனா்.
