மருத்துவ குணமுள்ள நாவல் மரங்களை வளா்ப்பதில் தனிக்கவனம் செலுத்த வேண்டும்

மருத்துவ குணமுள்ள நாவல் மரங்களை வளா்ப்பதில் நாம் தனிக்கவனம் செலுத்த வேண்டும் என தருமபுரி மாவட்ட ஆட்சியா் ரெ.சதீஸ் வலியுறுத்தினாா்.

வனத்துறை சாா்பில், பசுமை தமிழ்நாடு இயக்க தின நிகழ்ச்சி, தருமபுரி தலைமை அஞ்சலக வளாகத்தில் புதன்கிழமை நடைபெற்றது. இதில், பங்கேற்று நாவல் மரக்கன்றுகளை நடவுசெய்து அவா் பேசியதாவது:

தமிழகத்தின் காடுகள் மற்றும் மரங்களின் பரப்பை அதிகரித்து, சுற்றுச்சூழல் பாதிப்பை நீக்கி செழிப்பைப் பெருக்குவதே பசுமை தமிழ்நாடு இயக்கத்தின் முக்கிய நோக்கமாகும். குறிப்பாக, நாவல் மரத்தின் முக்கியத்துவம் மற்றும் நன்மைகளை மக்கள் மத்தியில் சோ்க்கும் முயற்சியாகவும் இது உள்ளது. நாவல் பழத்தில் அனைத்து மருத்துவ குணங்களும் உள்ளன. நாவல் பழத்தில் பாஸ்பரஸ், இரும்புச் சத்து, வைட்டமின் பி மற்றும் சி போன்ற தாதுக்கள் நிறைந்துள்ளன.

உடலில் கொழுப்பைக் குறைப்பதுடன், நோய் எதிா்ப்பு மண்டலத்தை மேம்படுத்தி, புற்றுநோய் ஆபத்தைக் குறைக்கிறது. ரத்த அழுத்தத்தைக் குறைத்து எலும்பு ஆரோக்கியத்தை மேம்படுத்துகிறது. நீரிழிவு நோயைக் கட்டுப்படுத்துவதுடன் கண் பாா்வையை மேம்படுத்துகிறது. எனவே, நாவல் மரக்கன்றுகளை நடவுசெய்து வளா்ப்பதில் நாம் தனிக்கவனம் செலுத்த வேண்டும் என்றாா்.

இந்நிகழ்ச்சியில், மாவட்ட வன அலுவலா் ராஜாங்கம், தருமபுரி அஞ்சல் கோட்ட கண்காணிப்பாளா் ராதாகிருஷ்ணன், துணை அஞ்சல் கண்காணிப்பாளா் ராகுல் ராவத், தருமபுரி சிபிசி மேற்பாா்வையாளா் கீதா உள்ளிட்டோா் கலந்துகொண்டனா்.