உணவகங்களில் சமையலறை மற்றும் கழிப்பறைகளை சுத்தமாக பராமரிக்க வேண்டும் என தருமபுரியில் செவ்வாய்க்கிழமை நடைபெற்ற உணவுப் பாதுகாப்புத் துறை ஆலோசனைக் கூட்டத்தில் ஆட்சியா் அறிவுறுத்தினாா்.
மாவட்ட உணவுப் பாதுகாப்புத் துறை சாா்பில், மாவட்ட அளவிலான ஆலோசனைக்குழு கூட்டம் செவ்வாய்க்கிழமை நடைபெற்றது. ஆட்சியா் ரெ.சதீஸ் தலைமை வகித்த இக்கூட்டத்தில், தருமபுரி மாவட்டத்தில் உணவுப் பாதுகாப்புத் துறையின் செயல்பாடுகள் குறித்து கலந்தாலோசிக்கப்பட்டது.
பென்னாகரம் ஒன்றியம், ஒகேனக்கல்லில் ஒருமுறை பயன்படுத்திய எண்ணெய்களை அதிகளவு சேகரித்து பயோடீசலாக மாற்ற அறிவுறுத்தப்பட்டது. மேலும், டீக்கடை மற்றும் சில்லி சிக்கன் கடைகளில் தடைசெய்யப்பட்ட நெகிழிப் பைகள் மற்றும் செய்தித் தாள்களில் உணவுப் பொருள்களை வழங்கக் கூடாது எனவும், பிளாஸ்டிக் தடை குறித்த விழிப்புணா்வை அதிக அளவு ஏற்படுத்தவும் அறிவுறுத்தப்பட்டது.
தருமபுரி மாவட்டத்தில் உணவகங்களில் சமையலறை மற்றும் கழிப்பறைகள் சுத்தமான முறையில் பராமரிக்க வேண்டும். மேலும், உணவகங்களில் கைகழுவும் இடம் சுத்தமாக வைத்திருக்க வலியுறுத்தப்பட்டது. திரையரங்குகளில் உள்ள கேன்டீன்ககளில் அதிகளவில் ஆய்வுகள் மேற்கொள்ள அறிவுறுத்தப்பட்டது. பொட்டலமிடப்பட்ட உணவுப் பொருள்களில் கட்டாயம் லேபிள் ஒட்ட வேண்டும். அவ்வாறு இல்லாத உணவுப் பொருள் பொட்டலமிடும் உணவு தயாரிப்பு நிறுவனங்களின் மீது அபராதம் விதிக்க அலுவலா்களுக்கு அறிவுறுத்தப்பட்டது.
மேலும், உணவுப் பொருள்கள் தொடா்பான புகாா்கள் இருப்பின் 94440 42322 என்ற வாட்ஸ் ஆப் எண்ணுக்கும், foodsafety.tn.gov.in இணையதளத்திலும் புகாா் தெரிவிக்கலாம் என ஆட்சியா் தெரிவித்தாா்.
இக்கூட்டத்தில், மாவட்ட உணவுப் பாதுகாப்பு நியமன அலுவலா் பி.கே.கைலாஷ்குமாா், மாவட்ட ஆட்சியரின் நோ்முக உதவியாளா் (சத்துணவு) சுமதி, தருமபுரி நகராட்சி உணவுப் பாதுகாப்பு அலுவலா் கே.நந்தகோபால் மற்றும் ஒன்றிய உணவுப் பாதுகாப்பு அலுவலா்கள் பங்கேற்றனா்.
