மஹரசங்கராந்தி : தஞ்சாவூர் பெரிய கோயில் நந்திக்கு 2,000 கிலோ காய், கனி, இனிப்புகளில் அலங்காரம்

உலகப்புகழ்பெற்ற தஞ்சாவூர் பெரியகோயிலில் பெங்கல் விழாவான நேற்று மாலை, மகாநந்தியம் பெருமானுக்கு பால், தயிர், மஞ்சள் உள்ளிட்ட மங்களப் பொருட்களால், சிறப்பு அபிஷேகம் மற்றும் தீபாராதனை நடைபெற்றது. இதில் ஏராளமான பகதர்கள் குடும்பத்துடன் கலந்து கொண்டனர். இந்த நிலையில் மஹரசங்கராந்தி, மாட்டு பொங்கல் விழா இன்று விமர்சையாக கொண்டாடப்பட்டது. இதற்காக பெருவுடையார், பெரியநாயகி அம்மனுக்கும் சிறப்பு அபிஷேகம், தீபாராதனை செய்யப்பட்டது.

இதைதொடர்ந்து கோயில் வளாகத்தில், அமைந்துள்ள மகாநந்தியம் பெருமானுக்கு உருளைக்கிழங்கு, கத்திரிக்காய், முட்டைகோஸ், பூசணிக்காய், வாழைக்காய், கேரட், நெல்லிக்காய் உள்ளிட்ட காய்கறிகள், ஆரஞ்சு, வாழை, ஆப்பிள், மாதுளை, கொய்யா உள்ளிட்ட பழங்கள், லட்டு, அதிரசம், ஜாங்கிரி, முறுக்கு உள்ளிட்ட இனிப்பு பலகாரம் மற்றும் பூக்கள் ஆகியவை கொண்டு சிரப்பு அலங்காரம் செய்யப்பட்டது. இதன் மொத்த எடை 2,000 கிலோ என்பது குறிப்பிடத்தக்கது.

பின்னர் அலங்காரம் முடிந்தவுடன் தீபாராதனை காண்பிக்கப்பட்டது. இதை தொடர்ந்து, நந்தி மண்டபத்துக்கு முன்பு நிறுத்தப்பட்டிருந்த 108 பசுக்களுக்கு சந்தனம், குங்குமம் பூசி மாலை அணிவித்தனர். மேலும் பட்டு துணி போர்த்தி கோ பூஜை செய்யப்பட்டது. இதில் ஏராளமான பக்தர்கள் தங்கள் பசு மாட்டுடன் வந்து கலந்து கொண்டு பூஜைகள் முடிந்த பிறகு பெருவுடையாரை வழிப்பட்டனர். நந்திக்கு படைக்கப்பட்ட காய்கறிகள், பழங்கள், இனிப்புகள் ஆகியவை பக்தர்களுக்கு பிரசாதமாக வழங்கப்பட்டது.