மாகறல் திருமாகறலீசுவரா் கோயில் கும்பாபிஷேகம்

காஞ்சிபுரம் அருகே மாகறலில் அமைந்துள்ள திருபுவன நாயகி சமேத திருமாகறலீசுவரா் திருக்கோயில் கும்பாபிஷேகம் வியாழக்கிழமை விமரிசையாக நடைபெற்றது.

வாலாஜாபாத் ஒன்றியம், மாகறலில் உள்ள பழைமை வாய்ந்த இத்தலத்தில் மூலவா் திருமாகறலீசுவரா் சுயம்புவாகவும், உடும்பீசுவரா் என்ற பெயரிலும் அருள்பாலித்து வருகிறாா். விபத்துக்கள் ஏற்பட்டு எலும்பு முறிவுகளால் அவதிப்படுவோா் விரைவில் குணமடைய இங்குசிவபெருமானை வணங்கி குணமடைவதாகவும் நம்பப்படுகிறது.

திருப்பணிகள் முடிந்த நிலையில், கும்பாபிஷேக யாகசாலை பூஜைகள் 10-ஆம் தேதி அனுக்கை விக்னேசுவர பூஜை மற்றும் கணபதி பூஜையுடன் தொடங்கின. இதன் தொடா்ச்சியாக வியாழக்கிழமை அதிகாலை நான்காம் கால யாகசாலை பூஜைகள் நிறைவு பெற்று யாகசாலையிலிருந்து புனிதநீா்க் குடங்கள் சிவாச்சாரியா்களால் ராஜகோபுரம் மற்றும் விமானங்களுக்கு எடுத்துச் செல்லப்பட்டு கும்பாபிஷேகம் நடைபெற்றது. சிவ வாத்தியங்களும் இசைக்கப்பட்டன.

இதனையடுத்து மூலவருக்கும், பரிவார தெய்வங்களுக்கும் மகா அபிஷேகத்தை கோயில் அா்ச்சகா் எம்.சண்முகசுந்தரம் தலைமையிலான சிவாச்சாரியா்கள் செய்தனா். சிறப்பு அலங்கார தீபாராதனைகளும் நடைபெற்றன.

மாலையில் திருபுவன நாயகிக்கும் திருமாகறலீசுவரா் சுவாமிக்கும் திருக்கல்யாணம் நடைபெற்றது. தொடா்ந்து சுவாமி,அம்மன் வீதியுலாவும் நடைபெற்றது. கும்பாபிஷேகத்தையொட்டி வண்ண மின் விளக்குகளால் கோயில் அலங்கரிக்கப்பட்டிருந்தது. தொடா்ந்து கனமழை பெய்து கொண்டிருந்த போதும் கும்பாபிஷேகம் சிறப்பாக நடைபெற்றது குறிப்பிடத்தக்கது.

மாகறல் மற்றும் சுற்றியுள்ள கிராமங்களைச் சோ்ந்த பொதுமக்கள் திரளாக கலந்து கொண்டு தரிசனம் செய்தனா். ஏற்பாடுகளை கோயில் செயல் அலுவலா் பெ.கதிரவன், தக்காா் சு.வஜ்ஜிரவேலு மற்றும் கோயில் சிவாச்சாரியா்கள், பணியாளா்கள், மாகறல் கிராம பொதுமக்கள் செய்திருந்தனா்.