டங்ஸ்டன் சுரங்க ஏல முடிவை மத்திய அரசு விரைவில் திரும்பப்பெறும்: கே.அண்ணாமலை பேட்டி

மதுரை மாவட்டம் அரிட்டாபட்டியில் டங்ஸ்டன் சுரங்கம் அமைப்பதற்கான ஏல முடிவை திரும்பப்பெறும் அறிவிப்பை மத்திய அரசு விரைவில் வெளியிடும் என்று தில்லியில் தமிழக பாஜக தலைவா் கே.அண்ணாமலை தெரிவித்தாா்.

மதுரை மாவட்டம், மதுரை மாவட்டம் அரிட்டாபட்டி, நாயக்கா்பட்டி பகுதியில் டங்ஸ்டன் சுரங்கம் அமைப்பதற்கு அப்பகுதியைச் சோ்ந்த மக்களிடையே எதிா்ப்பு எழுந்துள்ளது. தமிழக பாஜக தலைவா் கே.அண்ணாமலை மத்திய நிலக்கரி மற்றும் சுரங்கத் துறை அமைச்சா் கிஷண் ரெட்டியை தில்லியில் வியாழக்கிழமை சந்தித்து இந்த விவகாரம் தொடா்பாக பேசியிருந்தாா்.

இந்க நிவையில், புது தில்லியில் வெள்ளிக்கிழமை செய்தியாளா்களிடம் அவா் கூறியது:

டங்ஸ்டன் சுரங்க விவகாரத்தைப் பொருத்தமட்டில் தமிழகத்தை ஆளும் திமுகவின் போக்கு, பாஜகவின் போக்கிலிருந்து முற்றிலும் மாறுபட்டிருக்கிறது. ஒரு போட்டிய அரசியலாக திமுக அரசு செய்துகொண்டிருக்கிறது. பாஜக அரசானது ஹைட்ரோ காா்பன் விவகாரமாக இருந்தாலும், டங்ஸ்டன் விவகாரமாக இருந்தாலும் அனைத்துத் தரப்பினருடனும் ஆக்கபூா்வமாக பேசி எந்தப் பிரச்னைக்கும் தீா்வுகாண விரும்புகிறது.

தமிழக புயல் பாதிப்பு நிவாரண விவாகரத்தில்கூட கடந்த வாரம் மத்திய அரசு மாநில பேரிடா் நிவாரண நிதியாக ரூ.914 கோடியை கடந்த வாரம் ஒதுக்கியிருந்தது. இந்த விவகாரத்தில் தமிழக முதல்வரும் கடிதம் எழுதியிருந்தாா். பாஜக தரப்பில் நாங்களும் மத்திய உள்துறை அமைச்சரிடம் கேட்டுக்கொண்டிருந்தோம். அதன் அடிப்படையில் ரூ.914 கோடி தமிழகத்திற்கு ஒதுக்கப்பட்டது. தமிழகத்தைப் பொருத்தமட்டில் மத்திய அரசானது மாநிலப் பேரிடா் நிவாரண நிதியாக இருந்தாலும் சரி, தேசிய பேரிடா் நிவாரண நிதியாக இருந்தாலும் சரி உரிய முக்கியத்துவத்தை பாதிப்பு அடிப்படையில் ஒதுக்கீடு செய்து வருகிறது. டங்ஸ்டன் விவகாரத்தில் பிரச்னையை உருவாக்கியது திமுக அரசுதான். அதற்கு தீா்வை பாஜக தற்போது அளிக்க முயன்றுகொண்டிருக்கிறது.

மத்திய சுரங்கத் துறை அமைச்சகம் தமிழக அரசுக்கு 15.9.23-இல் தமிழக அரசுக்குக் டங்ஸ்டன் ஏல விவகாரம் தொடா்பாக கடிதம் எழுதியது. தமிழக அரசு 8.2.24-இல் மத்திய அரசுக்கு அரிட்டாபட்டி டங்ஸ்டன் சுரங்கம் தொடா்பான தகவல்களை விரிவாக அளித்தாா்கள். அதன் பிறகே நிகழாண்டு நவம்பரில் இதற்கான ஏலம் விடப்படுகிறது. கிட்டத்தட்டு ஒராண்டுக்கு மேலாக இந்த விவகாரம் குறித்து தமிழக அரசு வாய் திறக்காமல் இருந்துவிட்டு தற்போது விவகாரத்தை பெரிதாக்கி, சட்டப் பேரவையில் தீா்மானம் நிறைவேற்றியிருக்கிறது. எனினும், இந்த விவகாரத்தில் அரிட்டாபட்டி மக்களின் உணா்வையும், கருத்துகளையும் மதிக்கும் வகையில் இதற்கு தீா்வு அளிக்கும் வகையில் மத்திய அமைச்சா் கிஷண் ரெட்டியைச் சந்தித்து பிரச்னை எடுத்துரைத்துள்ளோம். இன்னும் சில நாளில் டங்க்ஸ்டன் ஏல முடிவை திரும்பப் பெறும் அறிவிப்பை மத்திய அரசு வெளியிடும் என்ற எதிா்பாா்க்கிறோம். தமிழக மீனவா்கள் விவகாரத்தில் இலங்கையில் அமைந்துள்ள புதிய அரசு கடுமையாக நடந்துகொள்வதாக தெரிகிறது. இந்த விவகாரத்தை மனிதாபிமான முறையில் அணுகுவது குறித்து மத்திய அரசின் வெளியுறவு மூலம் அந்நாட்டு அரசிடம் எடுத்துச்செல்ல தமிழக பாஜக தேவையான நடவடிக்கைகளை எடுக்கும் என்றாா் கே. அண்ணாமலை.