மாணவி வன்கொடுமை: "யார் அந்த சார்? என்ற விவரம் தெரிந்தால் ஆட்சி ஆட்டம் காணும்" - கடம்பூர் ராஜூ ஆவேசம்

தூத்துக்குடி மாவட்டம், கோவில்பட்டியில் அ.தி.மு.க வடக்கு மாவட்டம் சார்பாக தி.மு.க அரசைக் கண்டித்தும், அண்ணா பல்கலைக்கழக வளாகத்தில் மாணவிக்கு நடந்த பாலியல் வன்கொடுமையைக் கண்டித்தும் ஆர்ப்பாட்டம் நடைபெற்றது.

இதில், அ.தி.மு.க வடக்கு மாவட்டச் செயலாளரும், முன்னாள் அமைச்சருமான கடம்பூர் ராஜு கலந்து கொண்டார். அப்போது பேசிய அவர், ”முந்தைய 2021-ம் ஆண்டு சட்டமன்றத் தேர்தலின் போது 520 தேர்தல் வாக்குறுதிகள் கொடுத்து தி.மு.க ஆட்சிக்கு வந்தது. ஆனால், அதில் பத்து சதவீத தேர்தல் வாக்குறுதிகளை மட்டுமே நிறைவேற்றியுள்ளனர். கடந்த நான்கு ஆண்டுகளில் தமிழகத்தில் எந்த ஒரு பெரிய திட்டமும் கொண்டு வரப்படவில்லை.

இந்த தி.மு.க ஆட்சி கடனாளியான ஆட்சியாக உள்ளது. அத்துடன் இந்த ஆட்சியில் சட்டம் ஒழுங்கு சீர்கேடாக உள்ளது. மாணவர்களுக்குப் பாதுகாப்பில்லை. காதலிக்க மறுத்த மாணவி குத்தி கொலை செய்யப்படுகிறாள். ஆசிரியர்களுக்குப் பாதுகாப்பில்லை. பள்ளிக்குள்ளேயே சென்று குத்தி கொலை செய்யப்படுகிறார். மருத்துவர்களுக்கும் பாதுகாப்பில்லை. மருத்துவமனைக்குள்ளே சென்று தாக்கப்படுகிறார்கள். காவல்துறைக்கும் பாதுகாப்பில்லை. வழக்கறிஞர்களுக்கும் பாதுகாப்பில்லை.

இப்படி அனைத்து தரப்பு மக்களுக்கும் தமிழகத்தில் பாதுகாப்பில்லாத நிலையே நிலவுகிறது. இதற்குக் காரணம் தமிழகத்தில் போதைப் பொருள் நடமாட்டம் அதிகரித்துள்ளதுதான். பத்திரிக்கையில் பார்த்தால் தினம்தோறும் கொலை கொள்ளை சம்பவங்கள் குறித்த செய்திகளைத்தான் பார்க்க முடிகிறது. இந்த நிலையில்தான் அண்ணா பல்கலைக்கழக வளாகத்தில் மாணவி ஒருவர் பாலியல் வன்கொடுமை செய்யப்பட்டுள்ளார்.

இந்த வழக்கில் கைது செய்யப்பட்டுள்ள ஞானசேகரன், அமைச்சர் உதயநிதி ஸ்டாலினுடன் நெருக்கமாக இருக்கும் புகைப்படம் வெளியாகி உள்ளது. ஸ்டாலின் ஹிட்லர் சர்வாதிகாரி போலச் செயல்படுகிறார். பல்கலைக்கழக மாணவி விவகாரத்தில் ”யார் அந்த சார்?” என்ற விவகாரம் வெளியே வந்தால் இந்த ஆட்சி ஆட்டம் காண்கிற நிலை உருவாகும். ஆனால், பயத்தில் இதை மூடி மறைக்கிறார்கள். உயர்நீதிமன்றமே இதற்குக் கண்டனம் தெரிவித்திருக்கிறது. இந்த விவகாரத்தில் காவல் நிலையத்தில் ரகசியமாக இருக்க வேண்டிய எப்.ஐ.ஆரை கசிய விட்டது இந்த அரசு. எப்.ஐ.ஆர் கசிந்தது எப்படி? இதற்கெல்லாம்  விளக்கம் சொல்லாமல் தமிழக முதல்வர் ஊர் ஊராகச் சுற்றி வருகிறார்.” என்றார்.

நீங்கள் விரும்பி படித்த தொடர்கள், இப்போது ஆடியோ வடிவில்... புத்தம் புதிய விகடன் ப்ளே... உங்கள் அன்றாட பணிகளை கவனித்துக் கொண்டே ரசித்து கேட்க, உடனே இன்ஸ்டால் செய்யுங்கள்...

https://bit.ly/UlagaiMaatriyaThalaivargal