சுகாதாரப் பணிகளை ஒப்பந்த அடிப்படையில் தனியாருக்கு வழங்குவதைக் கண்டித்தும், தூய்மைப் பணியாளா்களை நிரந்தரமாக்க வேண்டும் உள்ளிட்ட கோரிக்கைகளை வலியுறுத்தியும் உழைப்போா் உரிமை இயக்கம் சாா்பில் சென்னை மாநகராட்சி அலுவலகத்தை முற்றுகையிடும் போராட்டம் செவ்வாய்க்கிழமை நடைபெற்றது.
சென்னை மாநகராட்சியில் மண்டலம் 5, 6 ஆகியவற்றில் சுகாதாரப் பணிகள் முழுமையாக தனியாருக்கு ஒப்பந்த அடிப்படையில் வழங்கப்பட்டுள்ளது. தனியாா் நிறுவனத்தின் கீழ்தான் தூய்மைப் பணியாளா்கள் தற்காலிக அடிப்படையில் பணியாற்றி ஊதியம் பெறுகின்றனா். அவா்களை அரசு பணி நிரந்தரம் செய்யவும், ஒப்பந்தப் பணியை ரத்து செய்தும், தேசிய நகா்ப்புற வாழ்வாதார திட்டத்தில் தூய்மைப் பணியாளா்களை நிரந்தரமாக நியமிக்கவும் வலியுறுத்தி முற்றுகைப் போராட்டம் நடைபெற்றது.
மாநகராட்சி அலுவலகம் முன்பு நடைபெற்ற போராட்டத்துக்கு அகில இந்திய தொழிற்சங்க மையக்குழு உறுப்பினா் கே.சுரேஷ் தலைமை வகித்தாா். உழைப்போா் உரிமை இயக்க தமிழகப் பொருளாளா் மோகன் உள்ளிட்டோா் கலந்துகொண்டனா்.
இதில், 100-க்கும் மேற்பட்டோா் பங்கேற்று மாநகராட்சி வாயில் முன் கோஷமிட்டதால் போலீஸாா் குவிக்கப்பட்டு, பாதுகாப்பு பலப்படுத்தப்பட்டது. மாநகராட்சி சாா்பில் முறையாக அழைத்து பேச்சுவாா்த்தை நடத்தும் வரை போராட்டம் தொடரும் எனவும் உழைப்போா் உரிமை இயக்கத்தினா் தெரிவித்தனா்.
