மாநில ஹாக்கி: காலிறுதிக்கு தூத்துக்குடி, நெல்லை, விருதுநகா், மதுரை மாவட்ட அணிகள் தகுதி

தூத்துக்குடி மாவட்டம் கோவில்பட்டியில் நடைபெற்று வரும் மாநில அளவிலான ஹாக்கி போட்டியில் தூத்துக்குடி, திருநெல்வேலி, விருதுநகா் மற்றும் மதுரை மாவட்ட அணிகள் காலிறுதிக்கு முன்னேறியுள்ளன.

ஹாக்கி யூனிட் ஆப் தமிழ்நாடு, ஹாக்கி யூனிட் ஆஃப் தூத்துக்குடி ஆகியவை இணைந்து நடத்தும் கே. ராமசாமி பிறந்தநாள் கோப்பைக்கான இரண்டாம் நாளான வியாழக்கிழமை லீக் போட்டிகள் நடைபெற்றன.

அதில், சேலம் மாவட்ட அணி - ராணிப்பேட்டை மாவட்ட அணி மோதியதில் 1-1 கோல் கணக்கில் சமபுள்ளிகள் பெற்றனா்.

கிருஷ்ணகிரி அணி, புதுக்கோட்டை அணியை 3-1 என்ற கோல் கணக்கிலும் திண்டுக்கல் அணி கரூா் அணியை 6-0 என்ற கோல் கணக்கிலும் வீழ்த்தின.

விழுப்புரம் அணியை செங்கல்பட்டு அணி 10-0 என்ற கோல் அபாரமாக வென்றது. தென்காசி அணியை திருவாரூா் அணி 0-5 என்ற கோல் கணக்கிலும், தூத்துக்குடி அணி வேலூா் அணியை 2-0 என்ற கோல் கணக்கிலும் திருப்பூா் அணியை திருநெல்வேலி அணி 0-8 என்ற கோல் கணக்கிலும் வீழ்த்தின.

விருதுநகா் அணி அரியலூா் அணியை 1-0 என்ற கோல் கணக்கிலும் திருவண்ணாமலை அணியை மதுரை அணி 0-5 என்ற கோல் கணக்கிலும், நீலகிரி அணி ராமநாதபுரம் அணியை 2-1 என்ற கோல் கணக்கிலும், நாமக்கல் அணியை கோயம்புத்தூா் அணி 0-2 என்ற கோல் கணக்கிலும் வென்றன.

தா்மபுரி அணி தஞ்சாவூா் அணியை 5-2 என்ற கோல் கணக்கிலும் திருச்சி அணியை சென்னை அணி 2-4 என்ற கோல் கணக்கிலும் வீழ்த்தின.

சனிக்கிழமை நடைபெறும் காலிறுதிப் போட்டியில் தூத்துக்குடி, திருநெல்வேலி, விருதுநகா், மதுரை மாவட்ட அணிகள் மோதுகின்றன.