ஆங்கில புத்தாண்டையொட்டி மாமல்லபுரத்தில் சுற்றுலா பயணிகள் குவிந்தனா். மேலும் பழைமையான புராதன சின்னங்களை கண்டு களித்தனா்.
செங்கல்பட்டு மாவட்டம், மாமல்லபுரம் நகரம் யுனெஸ்கோவால் உலக புராதன பகுதியாக அறிவிக்கப்பட்டுள்ளது. இதனால் நாள்தோறும் ஆயிரக்கணக்கான சுற்றுலா பயணிகள் வந்து செல்கின்றனா்.
இந்நிலையில் புத்தாண்டையொட்டி சுற்றுலா பயணிகள் ஏராளமானோா் மாமல்லபுரத்தில் குவிந்தனா். கடற்கரை கோயில், ஐந்தரதம், அா்ச்சுனன் தபசு, கணேச ரதம், பழைய கலங்கரை விளக்கம், உள்ளிட்டவை கூட்டத்தால் களைகட்டியது. குறிப்பாக வெண்ணை உருண்டை பாறை வளாகத்தில் குடும்பம், குடும்பமாகவும் நண்பா்கள் சறுக்கு பாறையில், குழந்தைகளுடன் விளையாடி மகிழ்ந்தனா். கடற்கரையில் குவிந்த பயணிகளில் பலா் அலையின் அழகை கண்டுரசித்து கடலில் குளித்து மகிழ்ந்தனா்.
திருட்டு சம்பவங்களில் ஈடுபடுபவா்களை பிடிக்க மாமல்லபுரம் ஆய்வாளா் பாலமுருகன், எஸ்.ஐ திருநாவுக்கரசு ஆகியோா் தலைமையில் ஏராளமான போலீஸாா் ரோந்து சென்றனா்.
மேலும், சுற்றுலா வாகனங்களால் போக்குவரத்து நெரிசல் காணப்பட்டது. போக்குவரத்து ஆய்வாளா் செல்வம் தலைமையில் முக்கிய சாலைகளை ஒரு வழி பாதையாக மாற்றினா். சுற்றுலா பயணிகள் வருகையால் வியாபாரம் களைகட்டியது. போதிய அரசு பேருந்துகள் இயக்கப்படாமல் குறைவான பேருந்துகளே இயக்கப்பட்டதால் சுற்றுலா வந்த பொதுமக்கள் மீண்டும் தங்கள் ஊா்களுக்கு செல்ல மிகுந்த சிரமப்பட்டனா்.
