மாற்றுத்திறனாளிகள் நலவாரிய அலுவல் சாரா உறுப்பினா்கள் பதவிக்கு விண்ணப்பிக்கலாம்!
மயிலாடுதுறை மாவட்டத்தில் மாற்றுத்திறனாளிகள் நலவாரிய உறுப்பினா் நியமனத்துக்குத் தகுதியுடையோா் விண்ணப்பிக்கலாம் என மாவட்ட ஆட்சியா் ஹெச்.எஸ்.ஸ்ரீகாந்த் தெரிவித்துள்ளாா்.
இதுகுறித்து அவா் வெள்ளிக்கிழமை வெளியிட்ட செய்தி: தமிழக அரசின் மாற்றுத்திறனாளிகள் நலவாரிய புதிய உறுப்பினா்கள் நியமனம் செய்ய வேண்டியுள்ளதால் பாா்வையற்றோா், செவித்திறன் பாதிக்கப்பட்டோா், தசைசிதைவு நோயால் பாதிக்கப்பட்டோா், தவழும் மாற்றுத்திறனாளிகள், உயரம் குறைந்த மாற்றுத்திறன் உடையோா், தொழுநோயால் பாதிக்கப்பட்டு குணமடைந்தோா், கை, கால் இயக்க குறைபாடுடைய மாற்றுத்திறனாளிகள் பிரதிநிதிகள் மற்றும் புறஉலக சிந்தனையற்ற மதி இறுக்கமுடையோா், முறை முடக்குவாதம், அமில வீச்சால் பாதிக்கப்பட்டோா், அறிவுசாா் குறையாடுடையோா், கற்றல் குறைபாடுடையோா், மனநலன் பாதிப்பு, ரத்தசோகை பாதிப்பு மற்றும் பல்வகை குறைபாட்டால் பாதிக்கப்பட்டோா் மற்றும் அவா்களுக்கு சேவை புரியும் தொண்டு நிறுவனத்தைச் சாா்ந்த பிரதிநிதிகள் இவ்வாரியத்தின் அலுவல்சாரா உறுப்பினா்களாக நியமிக்கும் பொருட்டு விண்ணப்பங்கள் வரவேற்கப்படுகிறது.
இதற்கான விண்ணப்பத்தினை மயிலாடுதுறை மாவட்ட ஆட்சியரகத்தில் தரைத்தளம் அறை எண்:23-ல் செயல்பட்டுவரும் மாவட்ட மாற்றுத்திறனாளிகள் நல அலுவலகத்தில் பெற்று மே 23-ஆம் தேதிக்குள் விண்ணப்பிக்கலாம். கூடுதல் விவரங்களுக்கு 0464-212730 என்ற தொலைபேசி எண்ணில் அறியலாம்.
