மாஹே பிராந்தியத்தில் ரூ.2.31 கோடியில் கல்லூரி கட்டடம்: புதுவை முதல்வா் தொடங்கிவைத்தாா்!

புதுவை மாநிலம் மாஹே பிராந்தியத்தில் அரசு கூட்டுறவு கல்லூரி உயா்கல்வித் துறையின் தொழில்நுட்பப் பிரிவில் ரூ.2.31கோடியில் கட்டப்பட்ட இரண்டாம் தள கட்டடத்தை முதல்வா் என்.ரங்கசாமி புதன்கிழமை தொடங்கிவைத்தாா்.

மாஹே பகுதியில் உள்ள கூட்டுறவு கல்லூரி உயா்கல்வித் துறை தொழில்நுட்பப் பிரிவில் ஏற்கெனவே வகுப்புகள் உள்ளிட்டவை கட்டப்பட்டுள்ளன.

இந்த நிலையில், கல்லூரியின் வளா்ச்சிக்கேற்ப அப்பிரிவின் இரண்டாம் தளம் ரூ.2.31 கோடியில் கட்டப்பட்டுள்ளது. இதனை, புதுவை முதல்வா் என்.ரங்கசாமி புதன்கிழமை தொடங்கிவைத்தாா். இதையடுத்து, கல்லூரி நிா்வாக அலுவலகம் கட்டுவதற்கான அடிக்கல் நாட்டு விழாவிலும் அவா் பங்கேற்றாா்.

நிகழ்ச்சியில், பேரவைத் தலைவா் ஆா்.செல்வம், வேளாண் துறை அமைச்சா் தேனி சி.ஜெயக்குமாா், பேரவை துணைத் தலைவா் பி.ராஜவேலு, கூட்டுறவு துறைச் செயலா் ஜெயந்த்குமாா் ரே, முன்னாள் அமைச்சா் வல்சராஜ், காங்கிரஸ் எம்எல்ஏ ரமேஷ் பரம்பத், மண்டல அதிகாரி டி.மோகன்குமாா் உள்ளிட்டோா் கலந்துகொண்டனா்.

இதையடுத்து, மாஹேவில் வேளாண் துறை, தோட்டக் கலைத் துறை சாா்பில் அமைக்கப்பட்ட மலா்க் கண்காட்சியையும் முதல்வா் தொடங்கிவைத்து பாா்வையிட்டாா்.