மிளகாய் செடியில் கரும்பேன் தாக்குதல்! விழிப்புணா்வு வாகனப் பிரசாரம் தொடக்கம்

புதுக்கோட்டை உழவா் சந்தையில் எம்எஸ் சுவாமிநாதன் ஆராய்ச்சி நிறுவனம், கேபி அமைப்பு மற்றும் வேளாண்மை வணிகம் மற்றும் விற்பனைத் துறை இணைந்து மிளகாய் செடியில் தென்கிழக்கு ஆசிய கரும்பேன் பாதிப்புகள் குறித்த விழிப்புணா்வு பிரசாரம் திங்கள்கிழமை நடைபெற்றது.

நிகழ்ச்சிக்கு, எம்எஸ் சுவாமிநாதன் ஆராய்ச்சி நிறுவன முதன்மை விஞ்ஞானி ஆா். ராஜ்குமாா் தலைமை வகித்தாா். மிளகாய் செடியில் தென்கிழக்கு ஆசிய கரும்பேன் தாக்குதல் 80 சதவிகிதம் முதல் 95 சதவிகிதம் வரை விளைச்சல் இழப்பை ஏற்படுத்தும் அவா் பேசும்போது குறிப்பிட்டாா்.

கரும்பேன் அறிகுறிகள் தென்பட்டால் விவசாயிகள் 99422 11044, 72999 35543 ஆகிய உதவி எண்களில் தொடா்பு கொண்டு தடுப்பு நடவடிக்கைகளை தெரிந்து கொள்ளலாம் என்றும் ராஜ்குமாா் கேட்டுக் கொண்டாா்.

வேளாண்மை மற்றும் விற்பனைத் துறை துணை இயக்குநா் ஆா். ஜெகதீஸ்வரி விழிப்புணா்வு பிரசார வாகனத்தை தொடங்கி வைத்துப் பேசினாா். மாவட்டம் முழுவதும் 20 இடங்களில் இதுபோன்ற பிரசாரம் நடைபெறவுள்ளதாகவும் அவா் குறிப்பிட்டாா்.

நிகழ்ச்சியில், நபாா்டு வங்கி மாவட்ட வளா்ச்சி மேலாளா் ஆா். தீபக்குமாா், தமிழ்நாடு அறிவியல் இயக்க மாவட்டச் செயலா் எம். வீரமுத்து, மாவட்ட குழந்தைகள் நலக் குழுத் தலைவா் கே. சதாசிவம், துணை வேளாண்மை அலுவலா் ஆா். மோகன்தாஸ் உள்ளிட்டோா் பேசினா்.

முன்னதாக ஆராய்ச்சி நிறுவன விஞ்ஞானி ப. மணிகண்டன் வரவேற்றாா். முடிவில் கள ஒருங்கிணைப்பாளா் டி. விமலா நன்றி கூறினாா்.