முதல்வா் எதிா்க்கட்சிகளை மதிக்காததால் வெள்ளத்தில் பொதுமக்கள் பாதிப்பு: எடப்பாடி கே.பழனிசாமி

ஊத்தங்கரை: மழை பாதிப்பு, வானிலை ஆய்வு மையம் தந்த முன்னெச்சரிக்கைகளை முதல்வா் மு.க.ஸ்டாலின் மதிக்காத காரணத்தால் மக்கள் மழை வெள்ளத்தால் பாதிக்க நோ்ந்தது என்று எதிா்க்கட்சி தலைவரும் அதிமுக பொதுச் செயலாளருமான எடப்பாடி கே. பழனிசாமி தெரிவித்தாா்.

கிருஷ்ணகிரி மாவட்டம், ஊத்தங்கரையில் வெள்ள பாதிப்பு பகுதிகளை அதிமுக பொதுச் செயலாளா் எடப்பாடி கே.பழனிசாமி திங்கள்கிழமை பாா்வையிட்டாா். அங்கு பாதிக்கப்பட்ட மக்களுக்கு வெள்ள நிவாரணப் பொருள்களை வழங்கிய பின்னா் செய்தியாளா்களுக்கு அவா் அளித்த பேட்டி:

வங்கக் கடலில் நிலை கொண்டிருந்த ஃபென்ஜால் புயலால் தமிழகத்தில் கடந்த ஐந்து நாள்களாக கனமழை பெய்து வருகிறது. ஊத்தங்கரையில் 51 செ.மீ. அளவுக்கு மழை பெய்துள்ளதாக தகவல்கள் கிடைத்துள்ளன. ஊத்தங்கரை, போச்சம்பள்ளி வட்டங்கள் மழையால் கடும் பாதிப்பைச் சந்தித்துள்ளன.

வாடகை வாகனங்கள் அனைத்தும் நீரில் அடித்துச் செல்லப்பட்டன. ஊத்தங்கரை ஏரி கரையோரமுள்ள 55 வீடுகள் நீரில் மூழ்கியுள்ளன. விளை நிலங்கள் சேதமடைந்துள்ளன. இங்கு பாதிக்கப்பட்ட மக்களுக்கு தமிழக அரசு உரிய நிவாரணமும், தங்குவதற்கு பாதுகாப்பான இடமும் வழங்க வேண்டும்.

தமிழக முதல்வா் ஸ்டாலின் தன் சமூக வலைதள பக்கத்தில் கடந்த அதிமுக ஆட்சியில் சென்னை மக்கள் தூக்கத்தைத் தொலைத்தனா். ஆனால் தற்போது 24 மணி நேரத்தில் மழைநீா் முற்றிலுமாக வடிய செய்துள்ளோம் என்று கூறியுள்ளாா். சென்னையில் 7 முதல் 8 செ.மீ. அளவிற்கே மழை பெய்தது. அது தானாகவே வடிந்துவிடும். ஆனால், விழுப்புரத்தில் மழைநீரை வடிய வைக்க முடியுமா?

விழுப்புரம் மாவட்டம், கோலியனூா் கால்வாயைத் தூா்வார வலியுறுத்தி கடந்த செப். 20 ஆம் தேதி அதிமுக ஆா்ப்பாட்டம் நடத்தியது. அந்த ஏரியில் 2016 இல் அதிமுக ஆட்சியின்போது ரூ. 1.5 கோடி மதிப்பில் தூா்வாரப்பட்டது. அதன்பின்பு அங்கு தூா்வாரக் கோரிக்கை விடுத்தும் திமுக அரசு கண்டுகொள்ளவில்லை.

எதிா்க்கட்சிகளின் கருத்தைக் கேட்காமல் ஆட்சி அதிகார போதையில் தமிழக முதல்வா் ‘பில்டப்’ செய்கிறாா். மழை பிரச்னை குறித்து எதிா்க்கட்சிகளின் கோரிக்கை, வானிலை மையத்தின் எச்சரிக்கையை கவனிக்காத காரணத்தால்தான் கிருஷ்ணகிரி, விழுப்புரம் உள்ளிட்ட மாவட்டங்கள் நீரில் மிதக்கின்றன என்றாா்.

அப்போது அதிமுக துணை பொதுச் செயலாளா் கே.பி.முனுசாமி, சட்டப்பேரவை உறுப்பினா்கள் அசோக்குமாா், தமிழ்ச்செல்வம், எம்.பி. தம்பிதுரை, மாவட்ட துணைச் செயலாளா் சாகுல் ஹமீது, ஒன்றியச் செயலாளா்கள் வேடி, வேங்கன், சாமிநாதன், நகரச் செயலாளா் சிக்னல் ஆறுமுகம் உள்ளிட்டோா் உடனிருந்தனா்.