தமிழக முதல்வா் மு.க.ஸ்டாலின் பிறந்தநாளை நலத்திட்ட உதவிகளை வழங்கி கொண்டாட வேண்டும் என சேலம் மத்திய மாவட்ட திமுக கூட்டத்தில் தீா்மானம் நிறைவேற்றப்பட்டது.
சேலம் மத்திய மாவட்ட திமுக பொது உறுப்பினா்கள் கூட்டம், கட்சி அலுவலகத்தில் வெள்ளிக்கிழமை நடைபெற்றது. மத்திய மாவட்ட அவைத் தலைவா் சுபாசு தலைமை வகித்தாா். இதில், மத்திய மாவட்டச் செயலாளரும், சுற்றுலா துறை அமைச்சருமான ராஜேந்திரன் கலந்துகொண்டு, முதல்வா் மு.க.ஸ்டாலின் பிறந்தநாள் விழாவை மாா்ச் 1-ஆம் தேதி சிறப்பாக கொண்டாடுவது குறித்து பேசினாா்.
இதில், முதல்வா் ஸ்டாலின் பிறந்தநாள் விழாவை மத்திய மாவட்டத்துக்கு உள்பட்ட அனைத்து பகுதிகளிலும், கட்சிக் கொடி ஏற்றுதல், பொதுக்கூட்டங்களை நடத்துதல், நலத்திட்ட உதவிகள் வழங்குதல், மருத்துவ முகாம்கள், மாணவா்களுக்கு விளையாட்டு போட்டிகள், மரக்கன்று நடுதல் போன்ற பல்வேறு நிகழ்ச்சிகளை நடத்த வேண்டும் என தீா்மானம் நிறைவேற்றப்பட்டது.
மேலும், முதல்வா் பிறந்தநாளையொட்டி மத்திய மாவட்ட திமுகவுக்கு உள்பட்ட பகுதிகளில் ஆண்களுக்கான கிரிக்கெட், கைப்பந்து, கால்பந்து, கபடி, தடகளம், இறகுப்பந்து, யோகா, பானை உடைத்தல், வலுதூக்குதல், மகளிருக்கு கோலப்போட்டி, கயிறு இழுத்தல், கோகோ, ஓவியப் போட்டி உள்ளிட்ட போட்டிகளை நடத்தி பரிசுகள் வழங்கவேண்டும் என தீா்மானம் நிறைவேற்றப்பட்டது.
இதில், தலைமை செயற்குழு உறுப்பினா்கள் ராஜேந்திரன், மணி, தகவல் தொழில்நுட்ப அணி மாநில துணைச் செயலாளா்கள் தருண், பரணிதரன், மாநகரச் செயலாளா் ரகுபதி, மண்டலக்குழு தலைவா்கள் அசோகன், தனசேகரன், சரவணன், சாந்தமூா்த்தி, மணமேடு மோகன், பிரகாஷ், ஜெசுதீஷ் உள்ளிட்டோா் கலந்துகொண்டனா்.
