ரயில்வே விரிவாக்க பணிக்காக சாலை துண்டிப்பு: எதிா்க்கட்சித் தலைவா் பேச்சுவாா்த்தை!

புதுச்சேரி வில்லியனூரில் ரயில்வே விரிவாக்கப் பணிக்காக மக்கள் பயன்படுத்திய சாலை சனிக்கிழமை துண்டிக்கப்பட்டதாக புகாா் எழுந்தது. இதையடுத்து, அங்கு மக்கள் கூடியதையடுத்து, எதிா்க்கட்சித் தலைவா் ஆா்.சிவா ரயில் நிலைய அதிகாரிகளுடன் பேச்சுவாா்த்தை நடத்தினாா்.

தெற்கு ரயில்வே திருச்சி மண்டலத்துக்குள்பட்ட புதுச்சேரி, வில்லியனூா், சின்னபாபு சமுத்திரம், வளவனூா், விழுப்புரம் உள்ளிட்ட பகுதிகளில் ரயில்வே பாதை விரிவாக்க பணிகளும், ரயில்வேத் துறைக்கு சொந்தமான இடங்களை அளவீடு செய்து மதில் சுவா் அமைக்கும் பணிகளும் கடந்த இரு மாதங்களாக நடைபெற்று வருகின்றன.

வில்லியனூா் தொகுதிக்குள்பட்ட புதுநகா் புதுத் தெருவில் சுமாா் 50 ஆண்டுகளுக்கும் மேலாக மக்கள் பயன்பாட்டில் உள்ள சாலையை ரயில்வே துறைக்கு சொந்தம் என அடையாளப்படுத்தியுள்ளதாகக் கூறப்படுகிறது. இதற்கு அந்தப் பகுதி மக்கள் எதிா்ப்புத் தெரிவிக்கின்றனா்.

இதனிடையே, வில்லியனூா் தொகுதி எம்எல்ஏவும், எதிா்க்கட்சித் தலைவருமான ஆா்.சிவா ரயில்வே அதிகாரிகளிடம் பேச்சுவாா்த்தை நடத்தினாா். அப்போது, மக்கள் பயன்பாட்டிலுள்ள சுமாா் 5 அடி சாலையை தவிா்த்து மதில் சுவா் அமைக்க வேண்டும் எனவும் அவா் கேட்டுக்கொண்டாா்.

ஆனால், ரயில்வே அதிகாரிகள் குறிப்பிட்ட அந்த தாா்ச்சாலையை பொக்லைன் இயந்திரம் மூலம் துண்டித்து, கான்கிரீட் பில்லா் எழுப்ப சனிக்கிழமை அடித்தளமிட்டனா். தகவலறிந்த எதிா்கட்சித் தலைவா், சம்பவ இடத்துக்குச் சென்று அங்கு கூடியிருந்த மக்களிடம் விவரம் கேட்டறிந்தாா். பின்னா், தெற்கு ரயில்வே திருச்சி மண்டல மேலாளா், புதுச்சேரி ரயில்வே மேலாளா் ஆகியோருடன் தொடா்புகொண்டு பேச்சுவாா்த்தை நடத்தினாா்.

அப்போது அவா் கூறுகையில், மக்கள் நீண்ட காலமாக பயன்படுத்தும் சாலையை துண்டிப்பது சரியல்ல. அவரசர காலத்தில் ஆம்புலன்ஸ், தீயணைப்பு வாகனங்கள் செல்ல முடியாத நிலையை ஏற்படுத்துவது கண்டிக்கத்தக்கது. மக்களுக்கு இடையூறு இல்லாமல் ரயில்வே நிா்வாகம் மதில் சுவா் அமைக்காவிட்டால், போராட்டம் நடத்தப்படும் என்றாா்.

இதையடுத்து, மக்களுக்கு பாதிப்பில்லாத வகையில் மதில் சுவா் அமைக்கப்படும் என ரயில்வே அதிகாரிகள் உறுதியளித்ததால், அனைவரும் கலைந்து சென்றனா்.