ரோஹித் சர்மா ஓய்வை அறிவித்தது தெரியாது; அஜிங்க்யா ரஹானே அதிர்ச்சி!

டெஸ்ட் போட்டிகளிலிருந்து ரோஹித் சர்மா ஓய்வை அறிவித்தது தனக்குத் தெரியாது என இந்திய அணி வீரர் அஜிங்க்யா ரஹானே தெரிவித்துள்ளார்.

இந்திய அணியின் கேப்டன் ரோஹித் சர்மா டெஸ்ட் போட்டிகளிலிருந்து ஓய்வு பெறுவதாக நேற்று (மே 7) அறிவித்தார். அவரது திடீர் அறிவிப்பு ரசிகர்களுக்கு அதிர்ச்சியை ஏற்படுத்தியது. இங்கிலாந்துக்கு எதிரான டெஸ்ட் தொடரில் இந்திய அணி அடுத்த மாதம் விளையாடவுள்ள நிலையில், ரோஹித் சர்மா ஓய்வு பெற்றுள்ளது முக்கியத்துவம் பெறுகிறது.

இதையும் படிக்க: டெஸ்ட் போட்டிகளுக்கான இந்திய அணியின் அடுத்த கேப்டன் யார்?

அஜிங்க்யா ரஹானே அதிர்ச்சி

டெஸ்ட் போட்டிகளிலிருந்து ரோஹித் சர்மா ஓய்வை அறிவித்தது தனக்குத் தெரியாது எனவும், அவரது முடிவு அதிர்ச்சியளிப்பதாக இருப்பதாகவும் இந்திய அணி வீரர் அஜிங்க்யா ரஹானே தெரிவித்துள்ளார்.

பிளே ஆஃப் சுற்றுக்குத் தகுதி பெறுவதற்கான முக்கியமான போட்டியில் சென்னை சூப்பர் கிங்ஸை எதிர்த்து ஈடன் கார்டன்ஸ் திடலில் நேற்று கொல்கத்தா நைட் ரைடர்ஸ் விளையாடியது. சென்னைக்கு எதிரான போட்டியில் விளையாடியதால் ரோஹித் சர்மாவின் டெஸ்ட் ஓய்வு முடிவை அஜிங்க்யா ரஹானே அறிந்திருக்கவில்லை.

சிஎஸ்கேவுக்கு எதிரான போட்டி நிறைவடைந்த பிறகு ரோஹித் சர்மாவின் ஓய்வு குறித்து அவர் பேசியதாவது: டெஸ்ட் போட்டிகளிலிருந்து ரோஹித் சர்மா ஓய்வு பெற்றுவிட்டாரா? அவர் டெஸ்ட் போட்டிகளில் மிகவும் சிறப்பாக செயல்பட்டுள்ளார். அவர் ஓய்வை அறிவித்தது எனக்குத் தெரியாது. அவரது ஓய்வு முடிவு எனக்கு அதிர்ச்சியளிக்கிறது. அவரது எதிர்கால பயணத்துக்கு எனது வாழ்த்துகள்.

இதையும் படிக்க: ரோஹித் சர்மாவின் ஓய்வு முடிவில் பிசிசிஐக்கு எந்த தொடர்பும் இல்லை: பிசிசிஐ துணைத் தலைவர்

பேட்ஸ்மேனாக டெஸ்ட் போட்டிகளில் ரோஹித் சர்மா மிகவும் சிறப்பாக செயல்பட்டுள்ளார். 5-வது அல்லது 6-வது வீரராக களமிறங்கி டெஸ்ட் கிரிக்கெட் பயணத்தைத் தொடங்கிய அவர், அணியின் தொடக்க ஆட்டக்காரராக மாறினார். தொடக்க ஆட்டக்காரராக விளையாட அவரை மாற்றிக்கொண்டது மிகவும் அற்புதமாக இருந்தது. பந்துவீச்சாளர்களுக்கு சவாலளிக்கும் விதமாக அவர் சிறப்பாக விளையாடக் கூடியவர் என்றார்.

38 வயதாகும் ரோஹித் சர்மா கடந்த 2013 ஆம் ஆண்டு இந்திய அணிக்காக டெஸ்ட் போட்டிகளில் அறிமுகமானார். இதுவரை இந்திய அணிக்காக  67 டெஸ்ட் போட்டிகளில் விளையாடியுள்ள அவர், 4301 ரன்கள் எடுத்துள்ளது குறிப்பிடத்தக்கது.