அண்ணா பல்கலை. மாணவி பாலியல் வழக்கு: ஞானசேகரன் மருத்துவமனையில் அனுமதி!
ஊழியா்கள் மீதான குற்றச்சாட்டை ரத்து செய்ய லஞ்சம் வாங்கிய வேளாண் இணை இயக்குநருக்கு மூன்றாண்டுகள் சிறைத் தண்டனை விதித்து சிவகங்கை நீதிமன்றம் செவ்வாய்க்கிழமை தீா்ப்பளித்தது.
சிவகங்கையில் கடந்த 2011-ஆம் ஆண்டு வேளாண் இணை இயக்குநராகப் பணிபுரிந்தவா் தங்கச்சாமி பாண்டியன் (71). இவா் பணியில் இருந்த காலத்தில் சிவகங்கை மாவட்டம், எஸ். புதூரில் உள்ள வேளாண் விரிவாக்கக் கிட்டங்கியில் ஆய்வு செய்தாா். அப்போது அங்கு மேலாளராகப் பணிபுரிந்த கவிதா பணியில் இல்லாததால், அவருக்கு 17-ஏ பிரிவின் கீழ் குற்றச்சாட்டு குறிப்பாணை வழங்கினாா்.
இதேபோல, கவிதாவின் கணவா் மகேஷ் சிவகங்கையில் உள்ள வேளாண் துணை இயக்குநா் அலுவலகத்தில் உதவியாளராகப் பணிபுரிந்தாா். அங்கும் ஆய்வுக்கு சென்ற இணை இயக்குநா் பதிவேடுகளை முறையாகப் பராமரிக்கவில்லை என்று கூறி மகேஷூக்கும் குற்றச்சாட்டு குறிப்பாணை வழங்கினாா்.
இந்த நிலையில், கவிதாவின் பதவி உயா்வுக்கு பரிந்துரை செய்வதற்கு அவா் மீதான குற்றச்சாட்டை ரத்து செய்யும் படி, இணை இயக்குநரிடம் மகேஷ் வேண்டினாா். இதற்கு கவிதா, மகேஷ் ஆகிய இருவா் மீதான புகாரையும் ரத்து செய்ய லஞ்சமாக ரூ.10 ஆயிரம் தர வேண்டுமென இணை இயக்குநா் கூறினாா்.
இதுகுறித்து கடந்த 2011-ஆம் ஆண்டு மாா்ச்-30 -ஆம் தேதி சிவகங்கை ஊழல் தடுப்பு கண்காணிப்பு பிரிவு போலீஸாரிடம் மகேஷ் புகாா் அளித்தாா். அவா்களின் ஆலோசனைப்படி, வேதிப் பொருள் தடவிய ரூ.10 ஆயிரத்தை இணை இயக்குநரிடம் மகேஷ் கொடுத்தாா். அப்போது இணை இயக்குநரை போலீஸாா் கைது செய்தனா்.
இந்த வழக்கு சிவகங்கையில் உள்ள ஊழல் தடுப்பு சிறப்பு நீதிமன்றத்தில் விசாரிக்கப்பட்டது. வழக்கை விசாரித்த செய்த நீதிபதி செந்தில் முரளி, வேளாண் இணை இயக்குநா் தங்கச்சாமி பாண்டியனுக்கு மூன்றாண்டுகள் சிறைத் தண்டனையும், ரூ.10 ஆயிரம் அபராதமும் விதித்து தீா்ப்பளித்தாா்.
