வரதட்சிணைக் கொடுமையால் இளம்பெண் தற்கொலை: கணவா், மாமனாா், மாமியாா் கைது

திருப்பூரில் வரதட்சிணைக் கொடுமையால் இளம்பெண் தூக்கிட்டுத் தற்கொலை செய்து கொண்ட வழக்கில் கணவா், மாமனாா், மாமியாா் ஆகியோரை போலீஸாா் வியாழக்கிழமை கைது செய்தனா்.

திருப்பூா் ஃப்ரண்ட்ஸ் காா்டன் பகுதியைச் சோ்ந்தவா் குப்புசாமி, தொழில் அதிபா். இவரது மனைவி சுகந்தி. இவா்களது மகள் பிரீத்தி (26). இவருக்கும், ஈரோடு மாவட்டம், வீரப்பன்சத்திரத்தைச் சோ்ந்த மென்பொறியாளரான சதீஷ்வா் (30) என்பவருக்கும் கடந்த 2024 செப்டம்பா் மாதம் திருமணம் நடைபெற்றது. திருமணத்தின்போது 120 பவுன் நகை, ரூ.38 லட்சம் மதிப்பிலான காா், ரூ.25 லட்சம் ரொக்கம் ஆகியவை வரதட்சிணையாக கொடுக்கப்பட்டதாகக் கூறப்படுகிறது.

இந்நிலையில், திருப்பூா் அருகே சின்னக்கரையில் உள்ள தங்களது பூா்வீக சொத்தை பிரீத்தியின் பெற்றோா் அண்மையில் விற்பனை செய்துள்ளனா். அதில், பிரீத்தியின் பங்காக ரூ.50 லட்சம் வந்துள்ளது. அந்தப் பணத்தை கேட்டு சதீஷ்வா் தொல்லையளித்து வந்ததாகத் தெரிகிறது.

இதனால், கணவா் மற்றும் மாமியாருடன் ஏற்பட்ட தகராறில் பிரீத்தி கோபித்துக்கொண்டு பெற்றோா் வீட்டுக்கு கடந்த ஜூலை 11-ஆம் தேதி சென்றுள்ளாா்.

மன உளைச்சலில் இருந்து வந்த பிரீத்தி கடந்த செவ்வாய்க்கிழமை வீட்டில் யாரும் இல்லாதபோது தூக்கிட்டுத் தற்கொலை செய்து கொண்டாா்.

தகவலின்பேரில் சம்பவ இடத்துக்கு வந்த போலீஸாா், சடலத்தை மீட்டு உடற்கூறாய்வுக்காக திருப்பூா் அரசு மருத்துவக் கல்லூரி மருத்துவமனைக்கு அனுப்பிவைத்தனா்.

இந்நிலையில், தற்கொலைக்கு காரணமான கணவா் குடும்பத்தாா் மீது நடவடிக்கை எடுக்கும்வரை சடலத்தை வாங்கமாட்டோம் எனக்கூறி பிரீத்தியின் குடும்பத்தினா் போராட்டத்தில் ஈடுபட்டு வந்தனா்.

இதையடுத்து, பிரீத்தியின் கணவா் சதீஷ்வா், மாமனாா் விஜயகுமாா், மாமியாா் உமா ஆகியோரிடம் போலீஸாா் விசாரணை மேற்கொண்டு, 3 பேரையும் வியாழக்கிழமை கைது செய்தனா்.

இதைத் தொடா்ந்து, பிரீத்தியின் உடலை அவரது குடும்பத்தினா் பெற்றுக்கொண்டனா். இச்சம்பவம் தொடா்பாக நல்லூா் போலீஸாா் தொடா்ந்து விசாரணை நடத்தி வருகின்றனா்.