ராமநாதபுரம் அருகே வியாபாரி கொல்லப்பட்ட வழக்கில் ஒருவருக்கு மாவட்ட விரைவு நீதிமன்றம் ஆயுள் தண்டனை விதித்து வெள்ளிக்கிழமை உத்தரவிட்டது.
சிவகங்கை மாவட்டம், திருப்பத்தூரைச் சோ்ந்தவா் சக்திவேல் (45). இவா் ராமநாதபுரம், சுற்றுவட்டாரப் பகுதிகளில் மளிகைப் பொருள்களை வாங்கி விற்று வந்தாா். இதனிடையே, திருப்புல்லாணி அருகே வண்ணாங்குண்டு பகுதியில் வரும் போது இவரது வாகனத்தில் மயில் ஒன்று சிக்கி இறந்தது. இதையடுத்து, வண்ணாங்குண்டு பகுதியைச் சோ்ந்த ஞானபாண்டியன் (52), அவருடன் வாக்குவாதத்தில் ஈடுபட்டாா். இதனால், இருவருக்கும் இடையே முன்விரோதம் இருந்து வந்தது.
இந்த நிலையில், கடந்த 2019- ஆம் ஆண்டு வண்ணாங்குண்டு கிராம நிா்வாக அலுவலகம் அருகே ஞானபாண்டியன், சக்திவேலை கத்தியால் குத்திக் கொலை செய்தாராம். இதுகுறித்து சக்திவேலின் மனைவி சங்கரி திருப்புல்லாணி காவல் நிலையத்தில் அளித்த புகாரின் பேரில் போலீஸாா் வழக்குப் பதிந்து ஞானபாண்டியனை கைது செய்தனா். இந்த வழக்கு விசாரணை ராமநாதபுரம் முதன்மை மாவட்ட நீதிமன்றத்தில் நடைபெற்று வந்தது. இதில், குற்றஞ்சாட்டப்பட்ட ஞானபாண்டியனுக்கு ஆயுள் தண்டனையும், ரூ. 10 ஆயிரம் அபராதமும் விதித்து நீதிபதி மெஹபூப் அலிகான் வெள்ளிக்கிழமை உத்தரவிட்டாா்.
இந்த வழக்கில் அரசு வழக்குரைஞா் காா்த்திகேயன் முன்னிலையாகி வாதிட்டாா்.
