திருவண்ணாமலை மாவட்டம், வெம்பாக்கம் ஊராட்சி ஒன்றியம், அழிவிடைதாங்கி ஊராட்சியில் புதிய கட்டடங்களை திறந்து வைத்து பயனாளிகளுக்கு அரசு நலத் திட்ட உதவிகளை பொதுப் பணி, நெடுஞ்சாலைகள் துறை அமைச்சா் எ.வ.வேலு ஞாயிற்றுக்கிழமை வழங்கினாா்.
விழாவுக்கு திருவண்ணாமலை மாவட்ட ஆட்சியா் தெ.பாஸ்கர பாண்டியன் தலைமை வகித்தாா். ஆரணி மக்களவை உறுப்பினா் எம்.எஸ்.தரணிவேந்தன், எம்.எல்.ஏக்கள் செய்யாறு ஒ.ஜோதி, வந்தவாசி எஸ்.அம்பேத்குமாா் ஆகியோா் முன்னிலை வகித்தனா். மாவட்ட ஊராட்சிக் குழுத் தலைவா் பாா்வதி சீனுவாசன் வரவேற்றாா்.
இதில் அமைச்சா் எ.வ.வேலு பங்கேற்று, வெம்பாக்கம் ஊராட்சியில் மாநில நிதிக் குழு மானியத்திட்டம் 2023-24 (மாவட்ட ஊராட்சி) திட்டத்தின் கீழ் ரூ. 70 லட்சத்தில் கட்டப்பட்ட கலைஞா் நூற்றாண்டு நிறைவு வணிக வளாகக் கட்டடம், அதனைத் தொடா்ந்து செய்யாறு தொகுதி மேம்பாட்டு நிதியின் கீழ் ரூ. 30 லட்சத்தில் கட்டப்பட்ட கலைஞா் நூற்றாண்டு நிறைவு பயணிகள் நிழற்குடை,
அழிவிடைதாங்கி ஊராட்சியில் தேசிய விருது தீன்தயாள் உபாத்யாய 2020 -21 திட்டத்தின் கீழ் ரூ. 50 லட்சத்தில் , மாநில நிதிக் குழு மானியம் 2024 -25 திட்டத்தின் கீழ் ரூ.63.35 லட்சத்தில் சட்டப்பேரவை உறுப்பினா் மேம்பாட்டு நிதி 2024 -25 திட்டத்தின் கீழ் ரூ. 19.32 லட்சம் என மொத்தம் ரூ.132.67 லட்சத்தில் கட்டப்பட்ட கலைஞா் நூற்றாண்டு நிறைவு சமுதாய கூடம் என மொத்தம் ரூ. 2 கோடியே 32 லட்சத்து 67 ஆயிரம் மதிப்பீட்டிலான கட்டடங்களை பொதுமக்களின் பயன்பாட்டுக்காக திறந்து வைத்தாா்.
விழாவில் வருவாய்த் துறை சாா்பில் ரூ. 15 லட்சத்தில் 50 பேருக்கு பட்டா மாற்றத்திற்கான ஆணைகளையும், 138 பேருக்கு சாதி சான்றிதழ்களும், 152 பேருக்கு வாரிசு சான்றிதழ்களும், 53 பேருக்கு சிறு, குறு விவசாயி சான்றிதழ்களும், 11 பேருக்கு புதிய குடும்ப அட்டைகளையும் ரூ.1.32 லட்சத்திலும், கூட்டுறவுத் துறை சாா்பில் 159 பேருக்கு ரூ.ஒரு கோடியே 6 லட்சத்து 63 ஆயிரத்து 700 ரூபாய் மதிப்பீட்டில் கடனுதவிக்கான ஆணைகளையும், வேளாண்மை துறை சாா்பாக ரு. 1.15 லட்சத்தில் 5 விவசாயிகளுக்கு வேளாண் இயந்திரம் மற்றும் உபகரணங்கள், மகளிா் திட்டம் சாா்பில் ஐந்து மகளிா் குழுக்களுக்கு தலா ரூ. 50 ஆயிரம் வீதம் மொத்தம் ரூ.2.5 லட்சம் கடன் உதவிக்கான காசோலைகள் நலத்திட்ட உதவிகளை அமைச்சா் வழங்கினாா்.
இந்நிகழ்ச்சியில் மாவட்ட வருவாய் அலுவலா் இரா.இராம்பிரதீபன், சாா் ஆட்சியா் பல்லவி வா்மா, வெம்பாக்கம் ஒன்றியக் குழு தலைவா் டி.ராஜி, வட்டார வளா்ச்சி அலுவலா்கள் மயில்வாகனன், ஷீலா அன்புமலா் உள்ளிட்ட பலா் கலந்துகொண்டனா்.
முடிவில் வட்டாட்சியா் துளசிராமன் நன்றி தெரிவித்தாா்.
