வெளிநாட்டு ஆராய்ச்சியாளருக்கு பாலியல் தொந்தரவு: ஜேஎன்யு பல்கலை. பேராசிரியா் பணியிலிருந்து நீக்கம்

வெளிநாட்டு ஆராய்ச்சியாளரை பாலியல் ரீதியாக துன்புறுத்தியதாக குற்றம்சாட்டப்பட்ட ஜவாஹா்லால் நேரு பல்கலைக்கழக (ஜேஎன்யு) பேராசிரியா் பணிநீக்கம் செய்யப்பட்டதாக வியாழக்கிழமை அதிகாரி ஒருவா் தெரிவித்தாா்.

சில மாதங்களுக்கு முன்பு ஒரு பல்கலைக்கழக நிகழ்வின்போது நடந்ததாகக் கூறப்படும் இச்சம்வம் மட்டுமின்றி, சம்பந்தப்பட்ட பேராசிரியா் மீது கடந்த காலங்களில் பல புகாா்கள் வந்துள்ளதாகவும் பல்கலைக்கழக அதிகாரிகள் உறுதிப்படுத்தினா்.

ஜேஎன்யு துணைவேந்தா் சாந்திஸ்ரீ துளிபுடி பண்டிட் கூறுகையில், ‘பாலியல் வேட்டையாடுபவா்கள், வாடகைதாரா்கள் மற்றும் ஊழல் நிறைந்த ஊழியா்கள் மீது இந்த நிா்வாகம் பூஜ்ஜிய சகிப்புத்தன்மை கொள்கைக்கு உறுதிபூண்டுள்ளது. இந்த பணிநீக்கம் பல்கலைக்கழக வளாக பாதுகாப்பு மற்றும் பொறுப்புக்கூறல் குறித்த உறுதியான நிலைப்பாட்டை பிரதிபலிக்கிறது என்றாா் அவா்.

விரிவான உள்ளக விசாரணைக்குப் பிறகு பல்கலைக்கழகத்தின்

மிக உயா்ந்த சட்டப்பூா்வ அமைப்பான நிா்வாகக் குழுவால் இந்த முடிவு எடுக்கப்பட்டுள்ளது. பாதிக்கப்பட்ட ஜப்பானிய ஆராய்ச்சியாளா், பல்கலைக்கழக நிகழ்வின்போது பேராசிரியரால் பாலியல் துன்புறுத்தலுக்கு ஆளானதாகக் கூறப்படுகிறது. ஜப்பானுக்குத் திரும்பியதும், பாதிக்கப்பட்ட ஆராய்ச்சியாளா் முறையான புகாரை அளித்தாா்.

இந்த விவகாரம் ராஜீய வழிகள் மூலம் இந்திய தூதரகத்தின் கவனத்திற்குக் கொண்டுவரப்பட்டது. அதன் பின்னா் இந்த விவகாரம் வெளியுறவு அமைச்சகம் மற்றும் பல்கலைக்கழகத்திற்கு அனுப்பப்பட்டது.

உள்ளக புகாா்கள் குழு, இக்குற்றச்சாட்டுகள் நம்பகமானவை என்று கண்டறிந்தது. அதன் பின்னா் நிா்வாகக் குழு, எந்த பலன்களும் இல்லாமல் குற்றம்சாட்டப்பட்ட பேராசிரியரை பணிநீக்கம் செய்ய பரிந்துரைத்தது.

குற்றம் சாட்டப்பட்டவா் பல்கலைக்கழகத்தின் மேல்முறையீட்டுக் குழுவின் முன் மேல்முறையீடு செய்யவோ அல்லது நீதிமன்றத்தை அணுகவோ உரிமை உள்ளதாக தகவலறிந்த வட்டாரங்கள் தெரிவித்தன.

இதற்கிடையில், சுற்றுச்சூழல் அறிவியல் துறையைச் சோ்ந்த மற்றொரு ஆசிரிய உறுப்பினா் ஒரு ஆராய்ச்சித் திட்டத்தில் ஊழல் குற்றச்சாட்டுகளுக்காக பணிநீக்கம் செய்யப்பட்டாா். இந்த வழக்கு மத்திய புலனாய்வுத் துறையின் விசாரணைக்கு பரிந்துரைக்கப்பட்டுள்ளது.

ஆராய்ச்சித் திட்டம் குறித்த உண்மை கண்டறியும் குழுவின் அறிக்கையைத் தொடா்ந்து இரண்டு ஆசிரியா் அல்லாத ஊழியா்களும் பணிநீக்கம் செய்யப்பட்டுள்ளனா்.

பிற விவகாரங்களில், ஆசிரிய உறுப்பினா்கள் சம்பள உயா்வுகை ள நிறுத்திவைத்தல், தணிக்கை செய்தல் மற்றும் கட்டாய உணா்திறன் பயிற்சி உள்ளிட்ட தண்டனைகளை எதிா்கொண்டுள்ளனா்.

உள்ளக புகாா் குழுவில் மாணவா் பிரதிநிதித்துவத்திற்கான தோ்தல்களை நடத்துவதற்கும் நிா்வாகக் குழு ஒப்புதல் அளித்துள்ளது.

இதுகுறித்து ஜேஎன்யுவின் மூத்த அதிகாரி ஒருவா் தெரிவிக்கையில், ‘பல்கலைக்கழகத்திற்குள் நோ்மை மற்றும் நெறிமுறைகளில் எந்த சமரசமும் இருக்காது என்பதற்கான வலுவான செய்தியாக இந்த முடிவுகள் உள்ளன என்றாா்.