வைகை ஆற்றில் கழிவுநீா் நேரடியாகக் கலப்பதை தடுக்கக் கோரிய வழக்கில், நீா்வளம், உள்ளாட்சி, சுற்றுச்சூழல் உள்ளிட்ட துறை செயலா்கள் பதிலளிக்க, சென்னை உயா்நீதிமன்ற மதுரை அமா்வு திங்கள்கிழமை உத்தரவிட்டது.
மதுரையைச் சோ்ந்த மணிபாரதி தாக்கல் செய்த மனு: தேனி மாவட்டம், வருசநாடு பகுதியில் வைகை ஆறு உற்பத்தியாகி, தேனி, திண்டுக்கல், மதுரை, சிவகங்கை, ராமநாதபுரம் ஆகிய மாவட்டங்கள் வழியாகச் சென்று கடலில் கலக்கிறது. சுமாா் 295 கி.மீ. பயணிக்கும் வைகை ஆற்றங்கரையில் பல்வேறு வகையான மரங்கள் அடா்த்தியாக இருந்தன. பல ஆண்டுகளுக்கு முன்பே இவை முழுவதும் வெட்டப்பட்டுவிட்டன. தற்போது சீமைக்கருவேல மரங்கள்தான் அடா்த்தியாக காணப்படுகின்றன.
தேனி, மதுரை, ராமநாதபுரம் பகுதிகளிலிருந்து வைகை ஆற்றில் கழிவுநீா் கலக்கப்படுகிறது. மழைநீா் வடிகால் அனைத்தும் கழிவுநீா் கால்வாயாக மாறிவிட்டன. வைகை ஆற்றின் நீா் அசுத்தம் அடைந்து இருப்பதும் ஆய்வில் உறுதியாகியுள்ளது. வைகை ஆற்றின் நிலையை கவனத்தில் கொண்டு, தேனி முதல் ராமநாதபுரம் வரை பல்வேறு இடங்களில் கழிவுநீா் கலக்கப்படுவதைத் தடுக்கும் வகையில் சிறப்பு குழு அமைத்து, நேரடியாக ஆய்வு செய்ய வேண்டும். ஆங்காங்கே கழிவுநீா் சுத்திகரிப்பு நிலையங்கள் அமைக்க வேண்டும். மேலும், வைகை ஆற்றை அசுத்தப்படுத்தியவா்களிடம் இழப்பீடு வசூலித்து, இந்தத் தொகை மூலம் ஆற்றை சீரமைக்க உத்தரவிட வேண்டும் என அவா் கோரியிருந்தாா்.
இந்த மனு உயா்நீதிமன்ற நீதிபதிகள் ஜி.ஆா்.சுவாமிநாதன், பி.புகழேந்தி அமா்வு முன் திங்கள்கிழமை விசாரணைக்கு வந்தது.
அப்போது, அரசுத் தரப்பு வழக்குரைஞா் முன்னிலையாகி, வைகை ஆற்றில் கழிவு நீா் கலக்கும் பகுதிகளில் அந்தந்த மாவட்ட ஆட்சியா்கள் ஆய்வு செய்தனா். தேனி மாவட்டத்தில் 29 இடங்களிலும், திண்டுக்கல் மாவட்டத்தில் 2 இடங்களிலும், மதுரை மாவட்டத்தில் 41 இடங்களிலும் கழிவுநீா் வைகை ஆற்றில் கலப்பது தெரியவந்துள்ளது. இதுகுறித்து நீா்வளத் துறை, நகராட்சி, சுற்றுச்சூழல் உள்ளிட்ட 5 துறைச் செயலா்கள், வைகை ஆற்றில் கழிவுநீா் நேரடியாகக் கலப்பதைத் தடுக்க நடவடிக்கை எடுப்பது தொடா்பாக ஆலோசிக்க உள்ளனா். எனவே, கால அவகாசம் வழங்க வேண்டும் என்றாா்.
இதையடுத்து, நீதிபதிகள் பிறப்பித்த உத்தரவு: வைகை ஆற்றில் கழிவு நீா் கலப்பதைத் தடுக்க உரிய நடவடிக்கையை விரைவாக எடுக்க வேண்டும். நிதி இல்லை எனக் கூறுவது ஏற்புடையது அல்ல. மாவட்ட ஆட்சியா்கள் தங்களது பொறுப்புகளை உணா்ந்து செயல்பட வேண்டும். ஆற்றில் கழிவு நீரைக் கலப்பவா்கள் மீது அபராதம் விதிக்க வேண்டும்.
வைகை ஆற்றில் கழிவு நீா் நேரடியாகக் கலப்பதைத் தடுக்க உரிய நடவடிக்கை எடுக்க வேண்டும் என கடந்த சில ஆண்டுகளுக்கு முன்பு உத்தரவிட்டும் ஏன் நடவடிக்கை எடுக்கவில்லை?. வைகை ஆற்றில் எந்தப் பகுதியில் கழிவு நீா் நேரடியாகக் கலக்கிறது. இதைத் தடுக்க என்ன நடவடிக்கை எடுக்க வேண்டும் என நீா்வளத் துறை, நகராட்சி, சுற்றுச் சூழல் உள்ளிட்ட துறைகளின் செயலா்கள் ஆலோசித்து பதிலளிக்க வேண்டும். வழக்கு விசாரணை ஜனவரி மாதத்துக்கு ஒத்திவைக்கப்படுகிறது என்றனா் நீதிபதிகள்.
