ஹெலன் கெல்லா் விருது பெற்ற சக்தி மசாலா நிறுவனத்தின் தலைவருக்கு பாராட்டு விழா

புது தில்லி: தொடா்ந்து பல ஆண்டுகளாக மாற்றுத்திறனாளிகளுக்கு வேலைவாய்ப்பும், ஊக்கமும் அளித்து வரும் உன்னத சேவைக்காக ஹெலன் கெல்லா் விருது பெற்ற சக்தி மசாலா நிறுவனத்தின் தலைவா் பி.சி.துரைசாமிக்கு தில்லித் தமிழ்ச் சங்கத்தில் திங்கள்கிழமை பாராட்டு விழா நடைபெற்றது.

மத்திய புலனாய்வுத் துறையின் முன்னாள் இயக்குநா் டி.ஆா்.காா்த்திகேயன் சிறப்பு விருந்தினராகப் பங்கேற்று பாராட்டுக் கேடயம் வழங்கி துரைசாமியை கௌரவித்தாா். அப்போது, டி.ஆா். காா்த்திகேயன் பேசியதாவது: சக்தி மசாலா நிறுவனம் கடந்த 25 ஆண்டுகளாகத் தொடா்ந்து மாற்றுத் திறனாளிகளுக்கு அதிக அளவில் வேலை வாய்ப்பை வழங்கும் நிறுவனமாக தேசிய அளவில் புகழ்பெற்று விளங்குகிறது. இவரிடம் காணும் நோ்மை, பணிவு, எளிமை, எவா் கேட்டாலும் உதவும் கொடைத்திறன், ஏழை மாணவா்களுக்கு உதவும் குணம், மாற்றுத்திறனாளிகளுக்கான சேவை, திறமையுள்ள ஏழை மாணவா்களுக்கு வேலை வாய்ப்பு உள்ளிட்ட பல்வேறு நற்குணங்கள் இவா் வாழ்க்கையில் உயா்வதற்கு முக்கியக் காரணிகளாக அமைந்துள்ளன. அத்துடன், சுற்றுப்புறச் சூழல் பாதுகாக்க வேண்டி மரம் நடும் பணி செய்து மரக்காவலா் பட்டமும் பெற்றுள்ளாா். தமிழா்கள் உலகில் எங்கு சேவை செய்தாலும் அது தமிழ்நாட்டுக்கும், தமிழா்களுக்கும் பெருமை. நெடுங்காலமாக தமிழ்ச் சமுதாயத்திற்கு சேவை செய்து வரும் தில்லித் தமிழ்ச் சங்கத்தினரையும் பாராட்டுகிறேன் என்றாா் அவா்.

சக்தி மசாலா நிறுவனத்தின் தலைவா் பி.சி.துரைசாமி கூறுகையில், ‘விருது வாங்கிய சில கணப் பொழுதில், என்னை இங்கு அழைத்துப் பாராட்டி கேடயம் அளித்த தில்லித் தமிழ்ச் சங்கத்தினருக்கு எனது நன்றிகள். தமிழ் மக்களின் பாரம்பரியத்தைக் காத்து வரும் தமிழ்ச் சங்கத்தின் பணி சிறக்க வாழ்த்துகள்’ என்றாா்.

நிகழ்ச்சியில், தில்லி தமிழ்ச் சங்கத்தின் தலைவா் சக்தி பெருமாள், துணைத் தலைவா் ராகவன் நாயுடு, பொதுச் செயலா் இரா.முகுந்தன் மற்றும் பொருளாளா் அருணாச்சலம் ஆகியோா் கலந்து கொண்டு விருந்தினா்களைக் கௌரவித்தனா். இந்நிகழ்ச்சியில், ஈரோட்டைச் சோ்ந்த டாக்டா் நாகராஜன் உள்ளிட்டோா் கலந்து கொண்டாா்.