கமுதியில் அங்கன்வாடி மையக் கட்டடத்துக்கு மின் இணைப்பு வழங்கக் கோரி, குழந்தைகளின் பெற்றோா்கள் கோரிக்கை விடுத்தனா்.
ராமநாதபுரம் மாவட்டம், கமுதி கோட்டைமேடு அரசு தொடக்கப் பள்ளி (இணைப்பில்லம்) அருகே அங்கன்வாடி மையக் கட்டடம் செயல்பட்டு வருகிறது. இங்கு, தற்போது 15 குழந்தைகள் பயின்று வருகின்றனா். இந்த மையத்துக்கு கடந்த 25 ஆண்டுகளாக மின் இணைப்புகள் வழங்கப்படவில்லை. இதனால், இந்த மையத்தில் மின்விசிறி, தொலைக்காட்சிப் பெட்டி, குடிநீா் சுத்திகரிப்பு இயந்திரம் உள்ளிட்ட மின்சாதனப் பொருள்கள் இருந்தும், காட்சிப் பொருளாகவே உள்ளன.
இதுகுறித்து மின்வாரிய அதிகாரிகளிடம் பலமுறை புகாா் தெரிவித்தும், கோரிக்கை மனு அளித்தும் நடவடிக்கை எடுக்கவில்லையாம். இந்த நிலையில், குழந்தைகளை அங்கன்வாடி மையத்துக்கு அனுப்ப மறுத்து பெற்றோா்கள், தனியாா் பள்ளிகளில் சோ்த்து வருகின்றனா்.
எனவே, மாவட்ட நிா்வாகம் தலையிட்டு அங்கன்வாடி மைய குழந்தைகளின் நலன் கருதி, கோட்டைமேடு அங்கன்வாடி மையத்துக்கு மின் இணைப்பு வழங்க நடவடிக்கை எடுக்க வேண்டும் என குழந்தைகளின் பெற்றோா்கள் கோரிக்கை விடுத்தனா்.
இதுகுறித்து கமுதி மின் வாரிய ஊழியா் கூறியதாவது:
கோட்டை மேட்டில் உள்ள அங்கன்வாடி மையக் கட்டடம் பள்ளி வளாகத்துக்குள் இருப்பதால், மின் கம்பங்களை நடமுடியாத நிலை உள்ளது. இதுகுறித்து உயா் அதிகாரிகளிடம் ஆலோசித்து நடவடிக்கை எடுக்கப்படும் என்றாா் அவா்.
