அரசுப் பள்ளியில் பயின்றவா்கள் உலக அளவில் முக்கியப் பொறுப்புகளில் சிறந்து விளங்குகின்றனா்!

அரசுப் பள்ளியில் பயின்ற மாணவா்கள் உலக அளவில் பல்வேறு முக்கியப் பொறுப்புகளில் சிறந்து விளங்குவதாக மாவட்ட ஆட்சியா் ரா.பிருந்தாதேவி கூறினாா்.

சேலம், கோட்டை அரசு மகளிா் மேல்நிலைப் பள்ளியின் 150-ஆவது ஆண்டு விழா மாவட்ட ஆட்சியா் ரா.பிருந்தாதேவி தலைமையில், மாநகராட்சி மேயா் ஆ.ராமச்சந்திரன் முன்னிலையில் சனிக்கிழமை நடைபெற்றது. இந்நிகழ்ச்சியில் மாவட்ட ஆட்சியா் பேசியதாவது:

சேலம் மாவட்டத்தில் மொத்தம் 70 அரசுப் பள்ளிகள் நூற்றாண்டைக் கடந்து செயல்பட்டு கொண்டிருக்கின்றன. இப்பள்ளிகளில் பயின்று தற்போது சிறந்த ஆளுமைகளாக விளங்கக் கூடிய முன்னாள் மாணவா்களை இந்நிகழ்ச்சிக்கு அழைத்து சிறப்பு செய்வதன் மூலம் தற்போது பயின்று வரும் மாணாக்கா்கள் எதிா்காலத்தில் தாங்களும் இத்தகைய உயா்ந்த நிலையை அடைந்திட ஊக்கமாக அமையும்.

நூற்றாண்டைக் கடந்து செயல்படும் பள்ளிகளில் முதன்மையான பள்ளியாக கோட்டை அரசு மகளிா் மேல்நிலைப் பள்ளி திகழ்ந்து வருகிறது. இப்பள்ளியானது 1874-ஆம் ஆண்டு தொடக்கப் பள்ளியாக தொடங்கப்பட்டு, உயா்நிலைப் பள்ளி, மேல்நிலைப் பள்ளியாக தரம் உயா்ந்து பல்வேறு துறை வல்லுநா்களையும், தலைசிறந்த ஆளுமைகளையும் உருவாக்கியுள்ளது.

குறிப்பாக, அரசுப் பள்ளி மாணவ, மாணவிகள் பல்வேறு பணிகளில் திறம்பட பணியாற்றும் தகுதியுள்ளவா்களாக உயா்வதற்கு அரசுப் பள்ளி ஆசிரியா்கள், அதன் சூழ்நிலை முக்கிய காரணமாக உள்ளது. அந்த வகையில், மருத்துவா்கள், பொறியாளா்கள், மக்கள் பிரதிநிதிகள், ஆசிரியா்கள், அரசு உயா் அலுவலா்கள் உள்ளிட்ட பல்வேறு முக்கிய பதவிகளில் உள்ளவா்களை உருவாக்கிய பெருமை இந்த கோட்டை அரசு மகளிா் மேல்நிலைப் பள்ளிக்கு உண்டு. இவை அனைத்தும் சிறந்த ஆசிரியா்களால் சாத்தியமாயின.

அதே போன்று, 150-ஆவது ஆண்டு சிறப்பு மலரில் இப்பள்ளியின் வரலாறு மற்றும் வளா்ச்சி குறித்து தெளிவாக குறிப்பிடப்பட்டுள்ளது. அரசுப் பள்ளி மாணவிகளாகிய நீங்கள் நல்ல முறையில் கல்வி கற்று எதிா்காலத்தில் உங்களது திறமைக்கு ஏற்ற துறையில் வல்லுநா்களாக திகழ வேண்டும். அதற்கு இந்த நிகழ்ச்சி உங்களுக்கு மிகப்பெரிய தன்னம்பிக்கையை வழங்கும் என்றாா்.

முன்னதாக, கோட்டை அரசு மகளிா் மேல்நிலைப் பள்ளியின் 150-ஆவது ஆண்டு விழாவையொட்டி தீபச்சுடரை ஏற்றி, ஆண்டு விழா கல்வெட்டை ஆட்சியா் ரா.பிருந்தாதேவி திறந்து வைத்தாா்.

இந்நிகழ்ச்சியில், மாநகர துணை மேயா் சாரதாதேவி, முதன்மைக் கல்வி அலுவலா் மு.கபீா், அஸ்தம்பட்டி மண்டலக் குழுத் தலைவா் உமாராணி, மாவட்ட கல்வி அலுவலா்கள், பெற்றோா் - ஆசிரியா் கழகத் தலைவா்கள், நிா்வாகிகள், முன்னாள் மாணவா்கள், ஆசிரியா்கள், மாணவிகள் உள்ளிட்டோா் கலந்துகொண்டனா்.