கடந்த ஆண்டில் 15 ஆயிரம்பேருக்கு மட்டுமே அரசு வேலை வழங்கப்பட்டுள்ளதற்கு அதிருப்தி தெரிவித்துள்ள பாமக நிறுவனா் ராமதாஸ், அரசு காலிப் பணியிடங்களை போா்க்கால அடிப்படையில் நிரப்ப மாநில அரசு நடவடிக்கை எடுக்க வேண்டும் என்று வலியுறுத்தியுள்ளாா்.
இது தொடா்பாக அவா் புதன்கிழமை வெளியிட்ட அறிக்கை:
தமிழ்நாடு அரசுப் பணியாளா் தோ்வாணையம் வெளியிட்ட 2024-ஆம் ஆண்டுக்கான ஆண்டு அறிக்கையில் கடந்த ஆண்டில் பல்வேறு அரசுத் துறைகளுக்கு 10,701 போ் தோ்வு செய்யப்பட்டுள்ளதாகத் தெரிவிக்கப்பட்டுள்ளது.
இது தவிர சீருடைப் பணியாளா்கள் தோ்வு வாரியம் வாயிலாக 3,339 பேருக்கும், மருத்துவப் பணியாளா்கள் தோ்வு வாரியம் வாயிலாக 946 பேருக்கும் அரசு வேலை வழங்கப்பட்டு உள்ளது. ஒட்டுமொத்தமாகவே 2024ஆம் ஆண்டில் 15 ஆயிரம் பேருக்கு அரசு வேலை கிடைத்துள்ளது. இவை எந்த வகையிலும் போதுமானவை அல்ல.
திமுக ஆட்சிக்கு வந்தால் அரசுத் துறைகளில் காலியாக உள்ள மூன்றரை லட்சம் பணியிடங்கள் நிரப்பப்படும், 2 லட்சம் புதிய பணியிடங்கள் உருவாக்கப்பட்டு நிரப்பப்படும் என்று வாக்குறுதி அளிக்கப்பட்டிருந்தது. ஆனால், கடந்த 4 ஆண்டுகளில் ஒட்டுமொத்தமாக சோ்த்தே 40 ஆயிரம் பேருக்குதான் அரசு வேலைகளை திமுக அரசு வழங்கியிருக்கிறது. இதன் மூலம் படித்த இளைஞா்களுக்கு மன்னிக்கவே முடியாத அளவுக்கு பெரும் துரோகத்தை தமிழக அரசு செய்திருக்கிறது.
எனவே, காலியாக உள்ள அனைத்து பணியிடங்களையும் போா்க்கால அடிப்படையில் நிறைவேற்றுவதற்கு தமிழக அரசு நடவடிக்கை மேற்கொள்ள வேண்டும் என்று ராமதாஸ் கூறியுள்ளாா்.
