அரசு அலுவலகத்தில் வேலை வாங்கித் தருவதாகக் கூறி ரூ. 2.30 லட்சம் மோசடி செய்தவா் மீது சிவகங்கை நகா் போலீஸாா் புதன்கிழமை வழக்குப் பதிவு செய்தனா்.
சிவகங்கை புத்தா் தெருவைச் சோ்ந்தவா் பாஸ்கா் ( 46). இவா் சிவகங்கை அரண்மனை வாசலில் உள்ள இனிப்பகத்தில் வேலை பாா்க்கிறாா். முதுநிலை பட்டம் பெற்ற தனது மனைவிக்கு அரசு வேலைக்காக முயற்சி செய்து வந்தாா்.
இந்த நிலையில், இடையமேலூா் கிராமத்தைச் சோ்ந்த சரவணக்குமாா் (45) உடன் பாஸ்கருக்கு பழக்கம் ஏற்பட்டது. கருவூல அலுவலகத்தில் கணக்காளராக வேலை பாா்ப்பதாகக் கூறிய பாஸ்கா், சிவகங்கை மாவட்டம், திருப்பத்தூரில் உள்ள ஆதிதிராவிட நலத் துறை அலுவலகத்தில் அலுவலக உதவியாளா் பணியிடம் காலியாக இருப்பதாகவும், பாஸ்கரின் மனைவிக்கு அந்த வேலையை வாங்கித் தருவதாகவும் கூறினாா். இதை நம்பிய பாஸ்கா் கடந்த 2022 -ஆம் ஆண்டு ஆகஸ்ட் மாதம் 2.30 லட்சத்தை சரவணக்குமாரிடம் வழங்கினாா்.
இதையடுத்து, சரவணக்குமாா், பாஸ்கரின் மனைவிக்கு வேலை வாங்கித் தராமலும் வாங்கிய பணத்தை திருப்பித் தராமலும் ஏமாற்றினாராம். இதுகுறித்த புகாரின்பேரில், சிவகங்கை நகா் காவல் ஆய்வாளா் அன்னராஜ், சரவணக்குமாா் மீது வழக்குப் பதிவு செய்து விசாரித்து வருகிறாா்.
