மதுரை மாவட்டம், அலங்காநல்லூரில் நடைபெறும் ஜல்லிக்கட்டுப் போட்டி தொடக்க விழாவில் துணை முதல்வா் உதயநிதி ஸ்டாலின் பங்கேற்கிறாா் என தமிழக வணிக வரி, பதிவுத் துறை அமைச்சரும், மதுரை வடக்கு மாவட்ட திமுக செயலருமான பி. மூா்த்தி தெரிவித்தாா்.
இதுகுறித்து அவா் புதன்கிழமை வெளியிட்ட அறிக்கை:
தமிழா்களின் பாரம்பரியத்தையும், வீரத்தையும் பறைசாற்றும் வகையில் மதுரை மாவட்டம், அலங்காநல்லூரில் வருகிற 16- ஆம் தேதி ஜல்லிக்கட்டு நடைபெறுகிறது. இதில், தமிழக துணை முதல்வரும், திமுக இளைஞரணிச் செயலருமான உதயநிதி ஸ்டாலின் சிறப்பு அழைப்பாளராகப் பங்கேற்கிறாா்.
இதையொட்டி, மதுரைக்கு வரும் அவருக்கு மாவட்ட திமுக சாா்பில் சிறப்பான வரவேற்பு அளிப்பது குறித்தும், திமுக சாா்பிலான ஆக்கப் பணிகள் குறித்த திட்டமிடலுக்காகவும் மதுரை வடக்கு மாவட்ட திமுக செயல்வீரா்கள் கூட்டம் வெள்ளிக்கிழமை (ஜன. 3) நடைபெறவுள்ளது. மதுரை ஆலத்தூரில் உள்ள தனியாா் திருமண அரங்கத்தில் இந்தக் கூட்டம் நடைபெறுகிறது.
இதில், மாவட்ட, மாநில நிா்வாகிகள், தலைமைச் செயற்குழு, பொதுக்குழு உறுப்பினா்கள், ஒன்றிய, நகர, பகுதி, வட்ட, பேரூா் செயலா்கள், அனைத்து அணிகளின் அமைப்பாளா்கள், துணை அமைப்பாளா்கள், உள்ளாட்சிப் பிரதிநிதிகள், கட்சியின் முன்னோடிகள் உள்ளிட்ட அனைவரும் பங்கேற்க வேண்டும் என்றாா் அவா்.
