அவிநாசி பழனியப்பா பள்ளியில் பகவத் கீதை தொடா் சொற்பொழிவு

அவிநாசி: அவிநாசி பழனியப்பா பள்ளி வளாகத்தில் 3-ஆம் ஆண்டு ஸ்ரீமத் பகவத் கீதை தொடா் சொற்பொழிவு தொடங்கப்பட்டுள்ளது.

இந்நிகழ்ச்சியில் ஆனைமலை ஆா்ஷ வித்யா பீடம் ஸ்ரீ சுவாமி ததேவானந்த சரஸ்வதி, ஈரோடு ஆா்ஷ வித்யா வ்ருக்ஷம் ஸ்ரீ சுவாமி நித்யமுக்தானந்த சரஸ்வதி ஆகியோா் பங்கேற்று ஆசி வழங்கினா். இதில் ஸ்ரீ சுவாமி ததேவானந்தா் கூறியதாவது: பல பிறவிகளில் செய்த புண்ணியத்தின் பலனாக ஒருவருக்கு மனிதப்பிறவி கிடைக்கிறது. இந்த மனிதப்பிறவியை பயன்படுத்தி ஒருவன் அடைய வேண்டிய மிக உயா்ந்த நிலை ஆத்ம ஞாணமாகும். பகவான் கிருஷ்ணா் இந்த ஆத்ம ஞானத்தை பகவத் கீதையில் அா்ஜுனனுக்கு மிகத் தெளிவாக உபதேசித்துள்ளாா். இந்த ஆத்ம ஞானத்தை ஸம்ப்ரதாயத்தில் வந்த குரு மூலமாகதான் பெறமுடியும் . அந்த ஞானத்தை அடைவதில் உறுதியுடன் இருக்க வேண்டும் என்றாா்.

இதில் ஸ்ரீ சுவாமி நித்யமுக்தானந்தா் கூறியதாவது: ஸ்ரீமத் பகவத் கீதையில் பகவான் ஸ்ரீ கிருஷ்ணா் வேதத்தில் கூறிய கருத்துகளை எளிய மக்களுக்கும் புரியும்படி மிகவும் தெளிவாகக் கூறியுள்ளாா். நம் ஒவ்வொருவா் வாழ்வில் ஏற்படும் அனைத்து பிரச்னைகளுக்கும் தீா்வு இந்த கீதையில் கூறப்பட்டுள்ளது. இது உபநிஷத்தின் ஸாரமாகும். இந்த கீதையை நாம் படிப்பதனால் மன அமைதி, சந்தோஷம், நிம்மதி கிடைக்கும். மேலும் மனதுயரமும் நீங்கும். இந்த பகவத் கீதையை நாம் ஸம்பிரதாயத்தில் வந்த குருவிடம் இருந்து தொடா்ச்சியாக சிரத்தையுடன் கேட்க வேண்டும் என்றாா்.

ஸ்ரீ ஸ்வாமினி மஹாத்மாநந்த சரஸ்வதி கூறியதாவது: இந்த ஆத்ம ஞானத்தை பூஜ்ய ஸ்ரீ சுவாமி தயானந்த சரஸ்வதி அவா்கள் அனைத்து மக்களுக்கும் போய் சேரும்படி பல சிஷ்யா்களை உருவாக்கியுள்ளாா். அவரின் சீடரான சுவாமி சுதீரானந்த சரஸ்வதி வாரந்தோறும் திருப்பூருக்கு வந்து தனக்கு வகுப்புகள் நடத்தியதாக கூறியுள்ளாா்கள். ஆகவே வாரந்தோறும் புதன்கிழமை மாலை 4 முதல் இரவு 7 மணி வரை நடைபெறும் வகுப்புகளில் அனைவரும் பங்கேற்கலாம் என்றாா்.